Ilisimatooq: Overhuset brexitimut inatsit pillugu piffissaarutilerpoq

Allannguutissatut siunnersuuterpassuit oqallisigineqarlutillu tallimanngorpat ualertinnagu suliarineqassapput, piffissaqarpianngilarlu.

Københavnip Universitetiani europami politikki pillugu ilinniarfimmi aqutsisoq professorilu, Marlene Wind, taama oqarpoq.

- Unnuarsuarmut suliniasagamik, madrassinik siniffik puunillu sillimmasersorput, Marlene Wind oqarpoq.

Tuluit ministeriunerat Boris Johnsen inatsisartunut oktobarip 19-aatinnagu isumaqatigiissuteqanngippat, Brexitip januaarip 31-ata tungaanut kinguartinneqarnissaa siunnersuutaavoq.

Taanna iluatsinngippat isumaqatigiissuteqarani EU-mit aninissaq, inatsisartuni amerlanerussuteqartut akuerisariassavaat.

- Inatsisissatut siunnersuutinik akuersisitsiniarneq tamarmi kimigiisissutaangaatsiarpoq, Overhusimiillu akuerineqartussaalluni, tamatumunngalu ullut amerlanngillat, Marlene Wind oqarpoq.

Inatsisissatut siunnersuut Underhusip pingasunngormat akueraa. Overhusetillu akuersinissaa tullinnguuppoq.

BBC naapertorlugu konservativit Labourillu isumaqatigiinniarnerminni nikerialertorput, naammassisassalli suli amerlaqaat.

AAMMA ATUARUK Boris Johnsonip amerlanerussuteqarnini ullumi annaavaa

Illuatungeriit sisamanngornerup unnuaani isumaqatigiinniarput, allannguutissatullu siunnersuutit assigiinngitsut taasissutigineqarlutik.

Tamanna tupaallannarpoq, Konservativimmi Overhusimi ikinnerussuteqartut inatsimmut 100-t missaannik allannguutissatut siunnersuuteqarput.

- Overhusip inatsisissatut siunnersuut itigartitsissutigisinnaanngilaa, allannguutissanilli siunnersuuteqarsinnaavoq, taamaaliorunillu suliarinera sivitsorsinnaallugu, Wind oqarpoq.

BBC naapertorlugu Overhusip inatsisissatut siunnersuutip immikkoortui tamaasa nunatta nalunaaqutaa naapertorlugu tallimanngorpat 14.00-inngortinnagu piareereersimassavai.

Boris Johnsonip inatsisartut sapaatip akunnerata tullianit oktobarip 14-ianut atorunnaarsikkallassammagit, sulineq ulapinnarpoq.

AAMMA ATUARUK Boris Johnsonip tuluit inatsisartui atoruunnaarallartinniarai

Overhusili suliassani angunmerisinnaarpasikkai, Københavnip Universitetiani Statskundskabimi professori Henrik Larsen erseqqissaavoq.

- Paasissutissat kingulliit naapertorlugit naatsorsuutigisamiit sukkanerungaatsiassaaq, Henrik Larsen oqarpoq.