Ilisimatooq Issittumi sakkutooqarnikkut saqitsaaffiunnginnissaa pillugu: Ajornakusuussaaq
Issittumut tunngatillugu periusissiassap nutaap suliarineqarnerani nunatsinnit anguniagaq maannamut tassaavoq ukiunut qulinut aggersunut periusissiami sakkutooqarnikkut saqitsaaffinngunnginiissaanut suliaqarnissaq.
Aamma naak issittumi naalagaaffiit sinnerisa aamma kissaatigigaluaraat Issittumi sakkutooqarnikkut sakkussiornerup tamanna ajornakusoortumik iliorneruvoq.
Dansk Institut for Internationale Studierimi tassa DIIS-imi ilisimatuuneq, Flemming Splidsboel Hansen taama naliliivoq.
- Ajoraluartumik piviusorsiornerusorinngilara, taanna oqarpoq, itisiliillunilu:
- Naalagaaffeqatigiinni, kisianni aamma issittumi naalagaaffinni allani Issittup saqitsaaffiunnginnissaata kissaatigineqarnera erseqqissaatigineqaraluarpoq. Aqukkuminaallisinnaasunilli ingeriartortoqarpoq, Flemming Splidsboel Hansen oqarpoq.
Rusland sakkussiortoq
Taassuma nunarsuarmi isumannaatsuuneq, Issittoq Ruslandilu ilisimatusarfigai, taassumalu Ruslandip piffimmi tassani sakkussiornera ilaatigut innersuussutigaa.
- Piffimmi sakkutooqarnikkut sakkussiortoqarnera pissutigalugu aqqaamasoqartutut ippoq, ilisimatuuneq oqarpoq, 2014-illu kingorna piffissaq pingaartumik maluginiarnerullugu.
- 2014-imimi Ruslandip Ukrainip qeqertaasaanut sakkutuunik isaatitsilluni tiguaanera nalunaarsorneqarpoq, Flemming Splidsboel Hansen oqarpoq.
AAMMA ATUARUK Nunatsinni Issittoq pillugu periusissiaq unitsikkallarneqartoq
Ruslandip Ukrainimiut qeqertaasaanik tiguaanera Issittumut pingaaruteqarsinnaanerata eqqumiippasissinnaanera taassuma nassuiaatigaa.
Nunalli kippasissumiittut Ruslandip tiguaanera pissutigalugu kinguneqartitsipput, akerleriissuteqarnerlu siartutut Issittumut anngunneranik kinguneqarpoq.
- Russillu immikkut paasisaqartuisa Ruslandip ilaatigut Østersømi sakkutuuni Issittumut 2014-imili nikisippai. Taamaammat russit tungaanniit 2014-ip kigunerani annertuumik sakkussiortoqarpoq – aamma Issittumi.
- Russit illersornissaannik ersarissumik annertuumik maanna Issittumiittoqarpoq, tamannalu atortorissaaruteqarnikkut sungiusarnikkullu takuarput, Flemming Splidsboel Hansen oqarpoq.
Suliassangaatsiaqassasoq
Taassumalu Issittumi naalagaaffiit sisamat Natomiittut Issittumut nutaamik atortoqartut erseqqisaatigaa. Taakku tassaapput Danmark, Norge, Canada USA-lu.
- Tassani annertunerusumik aammalu sungiusarnernik sukannernerusunik takuvugut, Flemming Splidsboel Hansen oqarpoq.
AAMMA ATUARUK Issittoq pillugu periusissiap kinguaattoornera ilisimatuumit ernumagineqanngitsoq
Taamaammat issittumi nunat Issittup saqitsaaffiunngiinnarnissaanut atatillugu annertuumik suliassaqarput.
- Isumaqarpunga anguniagaq assigiinngitsorpassuartigut kusarnartuusoq, issittumilu naalagaaffiit tamarmik tapersersuipput, ajoraluartumilli ingerlatsinerit ilaat utertinniarnissaat ajornakusuussapput. Ajornavissortuunngilaq, kisianni suliniuteqangaatsiartoqarnissaa pisariaqarpoq, Flemming Splidsboel Hansen oqarpoq.
