Issittoq pillugu periusissiap kinguaattoornera ilisimatuumit ernumagineqanngitsoq

- Kinguaartoortoqartillugu tamatigut uggornartarpoq. Kinguneqangaarnavianngilarli, Danmarkip Nunani tamalaani pissutsinik misissuisoqarfiani (DIIS-imi) Københavnimiittumi ilisimatooq, Flemming Splidsboel Hansen oqarpoq.

Periusissiaq naalagaaffeqatigiinnerup iluani nunanullu allanut pissuseqarnermi pingaaruteqartoq taassuma naqissuserpaa.

Pilersaarusiorneq pingaarutilik

Nunatta, Danmarkip Savalimmiullu periusissiornikkut Issittumi pissutsit ineriartornerannut iliuusissatik isumaqatigiissutigisariaqaraat, aammali taamaaliornikkut nunarsuup sinneranut ukkatarinninnermik nalunaarutiginninnerusoq, ilisimatooq oqarpoq:

- Taava aamma Issittoq qanoq isigineripput, suut pungaarnersiugariniarnerivut suut ernumatiginerivut sutigullu immikkut periarfissaqarnersugut naqitanngorlugu nunanut avatangiisutsinnut ilisimatitsissutitut atussavarput.

AAMMA ATUARUK Naalagaaffeqatigiit Issittoq pillugu ukiunut qulinut periusissialiartik saqqummiutingajaleraat

- Periusissiaqarnissaq taamaammat pingaaruteqarpoq, Issittormi pingaaruteqaleraluttuinnarpoq. Maannangaarli naammassineqarnissaa aalajangiisuunngilaq, Flemming Splidsboel Hansen oqarpoq.