Ilisimasassarsiortartoq pillugu atuagaq nutaaq

Aviisip Politikenip atuagaq saqqummersoq ullumi nersualaarlugu allaatigaa. Atuagaq qallunaatut atserneqarsimavoq Freuchen - Den Store Peter, tassalu atuakkiortuata Kurt L. Frederiksenip Freuchenip kalaallisut taaguutaa "Piitarsuaq" atuakkap aqqani innersuussuutigalugu.

Atuakkami atuarneqarsinnasut ilaagaat, Peter Freuchenip niuusaqarneranut nassuiaat (immaqa) eqqortoq. Amerlanerit isumaqartarput Freuchenip niuni illuikkami nammineerluni pilattorsimagaa. Atuagarli malillugu anorsuarmi appussaasimavoq, aqaguanilu anaminik qussaataliorsinnarluni appussaanerminit aniguisinnaasimavoq. Appussaanermilu tassani isikkamigut qerussornerisa kinguneranik isigaa kipineqartariaqarsimavoq.

Atuakkami ilaatigut aamma atuarneqarsinnaavoq qanoq ililluni Knud Rasmussenilu Sermersuaq itivikkaat qallunaat Tunumi tammartajaartut ikioriartorlugit. Ikiuiartoramik taquarisimavaat sukkut manngertut, issingigassat 7 kilo issortitassallu. Angalanermilu tassani Piitarsuaq ilaatigut illulerpoq nulumigullu naalikkamik kapineqarluni.

Atuakkiortup Peter Freuchen Mylius-Erichsenimut "Danmarksekspedition"-mi ilisimasassarsioqataaneranit, inuunini tamaat Knud Rasmussenimik ikinnguteqarneranut aammalu Avanersuarmi inooqataaneraniit Danmarkimi qeqertamit Eneøjemit Hollywoodimi filmiliaritittarneranut malinnaavigaa.

Atuakkamik allaatiginnittup atuakkami immikkut Peter Freuchen, angalaqatigisartagaa tusaamasaanerusoq, Knud Rasmussen, illikartiallalaarlugu, ilisaritilluarneqarmat nersualaarpaa.

- Kurt L. Frederiksenip atuakkiaani putoq sivisuumik milinneqarsimanngitsoq kiisami milinneqarpoq, Freuchenillu suliaasa annertuut pingaaruteqarnerat uppernarsarlugu, aviisi Politiken ilaatigut taama atuagaq pillugu allaaserinnippoq.

Atuagaq Freuchen - Den Store Peter atuakkanik naqiterisitsisarfiup Forlaget Sohnip saqqummersippaa.