Ilinniartut uniinnartarnerannut iliuuseqarniarlutik isumaqatigiissusiorput

Isumaqatigiissusiornermi ilinniartut saaffigisartagassaannik pilersitsinissaq ilaatigut anguniarneqartoq, Aalborgip Kommuniani borgmesteri, Thomas Kastrup-Larsen oqarpoq.

- Kalaallit ilinniagaqartut ilinniakkaminnik naammassinninnissaannik ikiorseerusuppugut, taamaalilluta ilinniartut maaniinnerminni ajortumik misigisaqaratik nunannersunik misigisaqarnissaat anguniarlutigu, Aalborgip kommuniata borgmesteria, Thomas Kastrup-Larsen oqarpoq.

Kalaallit Aalborgimi ilinniagaqartut ulluinnarni pisariaqartitaannik ikiorneqartassapput soorlu danskit ilinniagarnermi inatsisaat qanoq aaqqissugaanersut paasissutissiissutigineqartassallutik aamma pisariaqartinneqartunik allanik ikiorserneqartassallutik.

Aamma atuaruk Aalborg Sermersoorlu suleqatigiinneruniarput

Taamalu pilersaaruteqarneq Danmarkimi ilinniagaqartut kattuffiannit, Avalammit nuannaarutigineqarpoq.

- Tamanna kissaatigineqartutut ilinniartunut iluaqutaasinnaappat nuannaarutigiinnarsinnaavarput, Avalaap siulittaasua, Bjørk Lange Kristensen taama oqarpoq naqissuserlugulu oqarluni, nuannaarutigigamiuk Aalborgip kommuniata kalaallit ilinniagaqartut ulluinnarni atuareernerminni aamma suliffeqarfinni sulisarnissaannik ikiorniarlugit isumaqatigiissusiormata.

- Ilisimavarput ilinniarnerup nalaani suliffeqarfinni sulisarneq qanoq ilinniartumut pitsaatigisarnersoq, tassami taamaaliornikkut ilinniarnerup avataani pissutsit piviusut aamma ilikkagaqarfigineqartarmata, Avalaap siulittaasua, Bjørk Lange Kristensen taama oqarpoq.

Kalaallit Aalborgimi ilinniagaqartut amerlanerit ilinniakkaminnik naammassinnittarnissaat, Aalborg Kommunip Kommuneqarfik Sermersuullu isumaqatigiissusiorneranni anguniarneqarpoq.

- Danmarkimi ilinniagaqareernermi Kalaallit Nunaannut utertarnissaq siunertaavoq tassami ilinniarluarsimasunik pitsaasunillu sakkussaqarluartunik maani atorfissaqartitsisoqarpoq. Tamannalu angugaanni Kalaallit Nunaanni inerisaaqataasinnaanissaq aamma anguneqartussaalluni, Aalborg Kommuniata borgmesteria, Thomas Kastrup-Larsen oqarpoq.