Aalborg Sermersoorlu suleqatigiinneruniarput
Aalborgip Kommuniata Kommuneqarfik Sermersuullu suleqatigiinnerisa nukittorsarneqarnera, Aalborgip borgmesteriata, Thomas Kastrup-Larsenip taamatullu Kommuneqarfik Sermersuup borgmesteriata, Asii Chemnitz Narupip nuannaarutigaat.
- Uagut annertuumik paasissutissiivugut suleqatigiinnittalu nukittorsarneqarnissaanut periarfissat pitsaasut massakkut tunngavissikkatsigit nuannaartorujussuuvunga, Kommuneqarfik Sermersuup borgmesteria, Asii Chemnitz Narup oqarpoq imalu nangilluni:
- Aalborg kommuniata Kommuneqarfik Sermersuullu suleqatigiissimaneri ukiuni 40-ngajanni attanneqarpoq. Taamaammat suleqatigiinnerup ikinngutigiinnerullu nukittorsarneqarnissaa siunissarlu eqqarsaatigalugu tamassuma attatiinnarneqarnissaa uanga pingaartippara, Asii Chemnitz Narup oqarpoq.
AAMMA ATUARUK Aalborg Nuummi ulloqartinneqalersoq
Nuummi naapeqatigiipput ataatsimeersuarlutik
Kommuneqarfik Sermersuup Aalborg Kommunillu suleqatigiinnerisa nukittorsarneqarnera pillugu taakku Nuummi naapeqatigiipput ullunilu pingasuni ataatsimeersuarlutik.
Ataatsimeersuarnermi isumaqatigiissutigineqarlutik ilaatigut atsioqatigiissutigineqarput meeqqat, utoqqaat innarluutillillu pillugit paasisat sulisunillu ilinniartitsisarnissat. Ilaatigut teknologi atorlugu utoqqarnik sullissinermi Aalborgimiut ilisimasaat pingaartinneqarlutik.
- Nuummiut kalaallillu qanoq iliuusaat uagut Aalborgimiuusugut ilinniarfigilluarsinnaagatsigit naqissuseqqaassavara. Ilaatigut isumaginninnermut tunngasut. Tamassuma saniatigut issittumi pingaarutilinnik pilersitsisinnaaneq ilikkagaqarfigalutigu, tamannarpiarlu assut uagut pingaartipparput, Aalborgip borgmesteria, Thomas Kastrup-Larsen oqarpoq.
Aalborgip Kommuniata Kommuneqarfik Sermersuullu suleqatigiinnerisa nukittorsarneqarnera pillugu ataatsimeersuarneq ulluni pingasuni ingerlanneqartoq ippassaq naammassineqarpoq.