Aalborg Nuummi ulloqartinneqalersoq
Sapaatiuppat aggustip ulluisa qulingiluaannit aqqaneq-aappaata tungaanut Aalborg Nuummi qitiutinneqassaaq. Politikki, inuussutissarsiorneq, ilinniartitaaneq, ilisimatusarneq, kulturi, takornariaqarneq pisortallu suliffeqarfiutaat matumani inerisaaffigineqartarput.
- Nuup Aalborgillu akornanni politikkikkut inuussutissarsiornikkullu oqaluttuarisaanikkut atassuteqarluartarpoq - aammali inuttut tunngasutigut. Atassuteqaluarnerit taakku aalajangiusimanissaat, inerisarneqarnissaat nukittorsarnissaallu kissaatigaara, Kommuneqarfik Sermersuup borgmesteria Asii Chemnitz Narup oqarpoq.
Politikkikkut suleqatigiittoqarnerata ikinngutigiittullu sulinerup saniatigut isumaginninnermut kulturimullu tunngasut aamma sammineqartarput. Kiinnarpalerlutik aliikkusersuisartut misilittagaqarluartut, Dunkelfolket, Nuummut tikeraassapput, soorlu aamma nipilersortartut assigiinngitsut tusarnaartitsiniartut, Aalborg Studdenterhusimeersut tusarnaartitsisunut ilaassallutik.
- Neriuppunga ullut taakku nuannersumik inerititaqarfiulluartumik attaveqaateqarlualernermillu ingerlanneqarumaartut, illoqarfitta Aalborgip Nuullu akornanni pitsaasumik attaveqaqatigiinnermik nukittorsaaffiusussat, Asii Chemnitz Narup oqarpoq.