Ilisimatusarfik Ilinniartut saammaasseqatigiinneq oqaluuseraat

Nuummi Ilisimatusarfimmi ilinniartut ukiup affaani matumani ilinniarnerminni nunasiaataajunnaarsaanermi politikkimut sianissutsimullu tunngasunik ilinniagaqarput. Ilinniartut saammaasseqatigiinnissamut isumalioqatigiissitap isumaliutissiissutaa taassumalu imarisaata ilaa aaqqiagiinnginnermut tunngasoq, inuiaqatigiit suli akornanniittoq ullumikkut oqaluuseraat.

- Imminnut nikassarluta, uparuartorluta inguttaqattaaleraangatta takussutissaavoq nunasiaataasimanerup malitsingi nalinginnaalluinnartut takornartaanngitsut. Peqqutit pingaarnerpaat ilagivaat namminnerluta oqaluttuarisaanerput ilisimasakiffigivallaaripput, Else Marie Sørensen Petersen oqarpoq.

Ilisimatusarfimmi ilinniartitsisup, inuiaat kulturianni oqaluttuarisaanermilu immikkoortortaqarfimmi pisortap, Ebbe Volquardsenip isumaliutissiissut tupaallaatiginngilaa. Taassuma nunarsuarmi sumiiffinni allani nunaniaasaasimasut oqaluttuarisaanerannut tamanna aamma assingunerarpaa.

- Canadami Australiamilu inuiaat naqisimaneqartut imminnut inguttaallutik, kanngunarsaallutik appiussaattaarnerannik taasarpaat, Ebbe Volquardsen oqarpoq.

AAMMA ATUARUK Canadami isumalioqatigiissitaq nalunaarusianik saqqummersitsisoq

Eqqarsaartaatsikkut annersaanneq nunap inoqqaavisa tikissimasullu akornanniinnaq pineq ajortoq nunalli inoqqaavi iluminni aamma imminnut eqqarsartaatsikkut annersaattartut, Ebbe Volquardsen nassuiaavoq.

Eqqarsartaatikkullu annersaaneq inuiaqatigiinni nalingiinnginneq suli misigineqartarmat allanullu kamassap tutsinneqarsinnaanngimmat naligisamut kamassaq, uumitsannerlu tutsinneqartartoq nassuaatigalugu.

Ilinniartoq, Tina Kûitse aamma taama isummersimavoq.

- Kinguaariit siulii perorsagaanikuupput, ilinniagaqanngitsut ilinniagallillu immikkoorlutik. Taava uagut kinguaariinni maannakkut maluginngisatsinnik uani inissisimalertoorlugut; kikkut immikkoortissavagut kikkullu immikkoortisanngiagut, Tina Kûitsi oqarpoq.

Ebbe Volquardsen fortæller, at der ikke er meget forskning omkring fænomenet laterel violence

Ilisimatuut nutaat ajornartorsiutinut aaqqiissuteqassasut

Ebbe Volquardsenip Ilisimatusarfimmi ilinniartitaminut ilinniartitsissutigisani pingaartumik nunaniaajunnaariartornermi politikki eqqarsartaatsimullu tunngasoq pingaaruteqartoq erseqqissaatigaa.

- Tassami Oqaluttuarisaaneq paasiniaraanni saammaateqatigiinnissarlu anguniaraanni  ilinniartut ilinniarsimasaallu ajornartorsiutinut atorneqarsinaapput, ilinniartitsisoq oqarpoq.

Taassuma oqaluttuarisaanerup avataaniit qanoq oqaluttuarineqarneranut tunngasoq erseqqissaatigaa.

- Unammilligassat ajornartorsiutillu suunerannik oqaluttuartussat nunani allaneersuunginnissaat pingaartuupilussuuvoq, Ebbe Volquardsen oqarpoq.