Ilinniartut naammassisut qinersisinnaanngitsut
Qaammatini arfinilinni Kalaallit Nunaanni najugaqareersimanissaat piumasaqaataavoq.
Allanngortinneqartussaagaluarpoq tamannali piviusunngunngitsoorpoq.
Inatsisilerituutut ukiuni arfinilinni nunatta avataani ilinniartoq aasarlu naammassisoq ilinniartuunermini nunatsinni qinersisoqartillugu allakkatigut qinersisarsimavoq
- Nunatsinni najugaqarnikuunngitsut qaammatini arfinilinni utaqqeqqaartariaqarnerat paasisinnaagaluarpara , kisianni uagut nunatsinnut attaveqartuaannarnikuuusugut ingerlaannaq qinersisinnaatitaanermut piginnaatitaaffeqartariaqaraluarpugut, Inatsisilerituutut ilinniarnerminik naammassinneqammersoq, Maliina Louise Lyberth KNRimut oqarpoq.
Qinersisinnnaasut allattorsimaffiannut allatsinniarluni Maliina Louise Lyberth kommunemut saaffiginnippoq akissuteqartoqarnissarlu utaqqillugu.
Qinersisinnaatitaassanngikkuni sunniuteqaqataasinnaannginnini eqqumiigivaa
- Nunatsinnut akuunngitsutut misigissaanga, inatsisartunut qinersinissaq novemberip 28-ani pisussaq pingaaruteqartoq sunniuteqaqataaffigerusukkaluarpunga qinersisinnaassanngikkuma
eqqarsariaallassaanga, Maliina Louise Lyberth oqarpoq.
Inatsisartunut qinersineq 2013 sioqqullugu nunamut namminermut naalakkersuisoqarfik KNR-imit pineqartoq pillugu oqaloqatigineqarpoq . Tassani neriorsuutigineqarpoq ajornartorsiut taanna piaartumik suliarineqarumaartoq.
Inatsit allanngortinneqanngitsoortoq
- Maannakkut pineqartoq pillugu iliuuseqarsinnaanngilagut inatsisartunulli qinersinissap tulliuttup tungaanut iliuuseqarsinnaavugut, kommunalbestyrelsenut, nunaqarfinni aqutsisunut, ilagiillu sinniisaannut qinersinermi inatsisip oqaaseqartai atorlugit, Nunamut Namminermut naalakkersuisoqarfimmi immikkut ittumik siunnersortaasimasoq Leif Scharling knrimut 2013-mi oqarpoq.
Nunatta avataani ilinniartut nunatsinnut uternerminni qinersisinnaanissaannut qaammatit arfinillit nunatsinni najugaqareersimanissaat piumasaqaataavoq
Ullumikkut qaammatit 17it qaanngiupput inatsisit allanngortinneqarnissaannik oqartoqarmat.
Suli allanngortinneqanngillat, Namminersorlutik Oqartussat Nunami Namminermi Pissutsinut Allaffeqarfianit nalunaarutigineqarpoq.
