Ilinniartut aningaasarsiaqarnerulersut: Allannguingaarnavianngillat
Ilinniartut ilinniarnermusiaat ukiortaamiit qaffaavigineqarput.
Tamanna aningaasanut inatsisip 2023-moortup inatsisartunit novembarimi akuerineqarpoq.
Ilinniartunut 18-ileereersimasunut ilinniagaqarnersiutit qaammammut 134 koruuninik qaffanneqassapput. Ilinniarfinni piareersarfiusuni ilinniartut angajoqqaaminni suli najugaqartut ilinniagaqarnersiutaat qaammammut 63 koruuninik qaffassapput.
Ilinniartitaanermut Naalakkersuisup, Peter Olsenip (IA) ilinniarnermusiat qaffannerat nuannaarutigaa:
- Qaffaataasoq annertugisassaanngikkaluartoq - paasilluarsinnaavara sullugineqalaarsimappat - kisianni angusinnaasarput annerusinnaasimanngilaq. Pissutisit assigiinngitsut peqqutaapput. Ilaatigut eqqaasinnaavagut aningaasakilliorneq, aamma aningaasaqarnikkut sukangasuumik ingerlatsisariaqarsimavugut.
- Ajoraluartumik Ukrainemi sorsunneq nunarsuatsinnut aamma sunniupopoq, ilaatigut sanaartornikkut, ikummatissatigut inuussutissatigullu akit aamma qaffapiloorsimapput, Peter Olsen KNR-imut oqarpoq.
KNR-ilu Ilisimatusarfimmi ilinniartunik oqaloqateqarpoq, paasiniarlugu 134 koruunit qanoq taakkununnga iluaqutaassanersut, ilinniagaqarnermusiaqarnerulernertillu qanoq isumaqarfigineraat paasiniarlugu.
Julie Jeremiassen, peqqissaasunngorniaq.
134 koruuni qanoq ilinnut malunnaataava?
- Imatorujussuaq malugivallaanngilakka. Soorunami allannguuteqalaarput, kisianni misiginngilanga allannguerujussuartut.
Isumaqarpit ilinniartuususi ilinniarnermusiaqarnerusariaqaraluartusi?
- Ulluinnaat oqinnerulaassappata qaffanneqalaarsinnaapput. Marluliiliivissumik qitornaqarpunga, taamaattumillu ilinniarnermusiara qitornaqanngitsuniit 1000 koruunimik qaffasinneruvoq. Annertunngikkaluarpoq, soqannginnermiilli ajunnginneruvoq. Taamaakkaluartorli nalinginnaasumik ulluinnaqarnissamut naammannatik.
Ilinniarnermusiat qaffanneqarneranut pissutaavoq ilinniarnermusiat akit qaffakkiartorneranut malinnaasussaagamik, 134 koruunit matussusiisinnaappat akit akusunerulerneranit?
- Naamik, aallartissutaavoq. Akit qaffakkiartornerat eqqarsaatigissagaanni 134 koruuni naammanngilaq.
Runo Fenkcer Noahsen, inuussutissarsiornermi aningaasaqarnermut ilisimatusarnermut ilinniartoq.
Qaammamut 134 koruuni ilinnut qanoq isumaqarpat?
- Misigisimanngilanga 134 koruunit allannguuteqartitsissasut. Atuarnerma saniatigut sulisarama taamaammat 134 koruunit malunnaataanavianngillat.
Isumaqarpit ilinniartuususi ilinniarnermusiaqarnerusariaqaraluartusi?
- Naamik, taamak isumaqanngilanga.
Ilinniagaqarnermorsiatit massakkut naammagivigit?
- Aap, taamak oqarsinnaavunga. Pisiassat akitsoraluttuinnaraluartut tunisittuaannarsinnaanngilagut, pisartakkagummi akilerneqartarput aamma. Namminerlu sulisalerutta aamma akiliisartussaassalluta, taamaalilluta uagut aamma tullissatsinnut akiliisalertussaassalluta.
Nicolas Skifte Damgaard, inuussutissarsiornermi aningaasaqarnermut ilisimatusarnermut ilinniartoq.
Qaammamut 134 koruuni ilinnut qanoq isumaqarpat?
- Imatorujussuaq malunniuteqanngillat, ilinniarnermalu saniatigut aamma suliffeqarama. Akillu qaffakkiartornerat eqqarsaatigissagaanni ilinniagaqarmorsiaqalernerulernerput isumaqappallaanngilaq.
Ilinniarnermusiat qaffanneqarneranut pissutaavoq ilinniarnermusiat akit qaffakkiartorneranut malinnaasussaagamik, 134 koruunit matussusiisinnaappat akit akusunerulerneranit?
- Akitsuutit 1,8 procentimik qaffapput,134 koruunillu ilinniagaqanermusiatta 1 procenti ataallugu. Taamaasilluni qaffaataaniaraluartoq iluaqutaanngitsoorpoq.
Isumaqarpit ilinniartuususi ilinniarnermusiaqarnerusariaqaraluartusi?
- Oqaatigissallugu nalunarpoq. Nunatsinni ilinniartuulluni ajunngitsorsiaagami, saniatigut pisartakkat eqqarsaatigissagaanni. Akiligassat amerlasuut akilerneq ajorpagut, soorlu nakorsiartarpugut akeqanngitsumik, kigutileriffiit akeqanngitsut, ineqarnermullu akiligassakujunnik taperserneqartarluta. Isumaqanngilangali oqarsinnaallunga ilinniagaqarnermusiagut qaffattut.
SIK-mit tigulluarneqarpallaanngitsoq
Ilinniagaqarnermusiat qaffanneqarnerat SIK-mit hurraartuutigineqanngilaq.
SIK-p Inuusuttaata siulittaasuat naalakkersuisup ilinniagaqarnermusiat 134 koruunimik qaffammata nuannaarutigimmagu tupigalugu tusagassiuutinut nalunaarummini allappoq.
- Siunissami ilinnialerusuttunik ujarlissagutta malunnaatilimmik qaffaateqartariaqarput.
- Kanngusaarneqaannarsinnaanngillat ilinniartut, uatsitulli atugaqarput, uatsitulli nerisassat akiinik akiliisarput, ineqarnermut akiliisarput. Kanngunarpallaarujussuaqaaq 134 koruunit nuannaarutaasutut nalunaarutigineqartoq, Peter B. Mølgaard allappoq.
18-it sinnerlugit ukiullit ilinniaqqiffinnut ingerlaqqittut ukiortaamiit qaammammut tapiissutissaat 4.834 koruuniusassapput. Ilinniarnerni piareersarfiusuni ilinniartut suli 18-iliineqanngitsut tapiissutaat ukiortaamiit qaammammut 2.288 koruuniusassapput.
