Ilinniartut angerlarnissaannut periarfissaqartariaqarpoq
Danmarkimi kalaallit ilinniagaqartut peqatigiiffigat Avalak aamma kommuneqarfiit kattuffiat Kanukoka suleqatigiillutik ilinniakkamik naammassisut angerlarnissamut periarfissaginnerulernissaannik ujartuipput tassanilu paaqqinnittarfinni atukkat tikinneqartut ilagaat. Tassami taanna qulakkeerneqarsinnaappat ilinniagareersut angerlarnissaat aamma qulakkeerneqarsinnaasutut isigineqarpoq.
- Kissaatigisaq tamanna Kalaallit Nunaanni Kommunit Kattuffiata ukiorpaaluit matuma siornatigut ilinniagaqarnermut suliffeqarnermullu tunngasunik Danmarkimi saqqummersitsisarnernik aallarneeqataanermigut suleqataaffigisimavaa. Ullumikkut angerlartartut ilinniagaqarsimasut affaannut missiliuunneqarput. Tassa angerlanngitsoortut ajoraluartumik suli amerlavallaarput, Kanukokap siulittaasua Martha Abelsen (S) oqarpoq.
Avalak aamma Kanukoka isumaqarput angerlarnissaq ukiumik ataatsimik sioqqullugu meeqqerivimmiittuuteqalernissamut allatsittoqarsinnaalertariaqartoq. Qanittumi pakatsisut ilagaat nakorsanngorlaaq Danmarkimi suliffittaarnissaminik toqqaaginnartariaqalersoq ilaqutariit meerartaat paaqqinnittarfimmi inissaqanngimmata, naak angerlarusukkaluarlutik. Atorfiit pingaarutillit kalaallinik inuttalernissaat tamakkiisumik iluatsissinnaanngilaq taama ingerlasoqaannassappat.
Taamaammat Avalak aamma Kanukoka kommunini Inatsisartunilu politikkerinut kaammattuutigaat Danmarkiliartarnerminni kalaallit ilinniagaqartut piffissaqarfigisaqqullugit. Taamaasiornikkut Nunatsinni allaffissornikkut politikkikkullu pissutsinik ilinniartut malinnaatinneqarsinnaassammata.
