Ilinniartitaanermut Naalakkersuisoqarfik: Qaasuitsup kommuniata atuarfeqarnermut inatsit unioqqutippaa

Qaasuitsup Kommunia ukiumi atuartitsiviusussami tulliuttumi akunnerit atuartitsiviusussat 15 procentiinik ikilisaanissamik pilersaaruteqarpoq, illoqarfinni mikinerusuni nunaqarfinnilu.

Atuartut atuartinneqarnissaannut akunnerit ikinnerpaaffigisassaannik ikinnerusunik atuartitsinissamut kommunip pilersaaruteqarnera meeqqat atuarfiat pillugu unioqqutitsinerusoq, ilinniartitsisut meeqqat atuarfianneersut kattuffianni  IMAK-imi siulittaasoq Sivso Dorph isumaqarpoq.

Taamaattumik ilinniartitsisut meeqqat atuarfianeersut kattuffiata IMAK-ip Qaasuitsup Kommunia kommunit  nakkutilliisoqarfiannut tunniuppaa.

Qaasuitsup Kommuniata aningaasameernerata meeqqat atuartut akilisissanngilai, IMAK-imi siulitaasoq Sivso Dorph allappoq.

Aamma atuaruk IMAK-ip isornartorsiuinera Qaasuitsup pimooruppaa

Kommunip inatsisinik unioqqutitsisimaneranik IMAK-ip oqarnera ilinniartitaanermut naalakkersuisoqarfimmit taperserneqarpoq, taamaattumik Ilinniartitaanermut naalakkersuisoqarfik Qaasuitsup Kommunianut saaffiginnippoq, inatsisinik unioqqutitsineq erseqqissaatigineqarluni.

 -  Kaammaattuisinnaavugut inatsit malinneqassasoq, aamma eqqumiilaassaaq inatsisiliussagutta malikkusunngikkaanni malinneqartanngitsumik, Kaali Olsen oqarpoq.

- Inatsit sanaajuvoq meeqqat sapinngisamik pitsaanerpaamik atuartinneqarnissaat qulakkeerniarlugu, taanna kaammattuutigeqqissavarput inatsit malinneqassasoq, inatsisaatsunngussaagut meeqqat atuarfianni inatsit malinneqartassanngippat, Kaali Olsen, Namminersorlutik Oqartussani Ilinniartitaanermut naalakkersuisoqarfimmi inspektøri taama oqarpoq.

Naalakkersuisoqarfiup Qaasuitsup kommunianut saaffiginnissutaa suli akissuteqarfigineqanngilaq.