Ilinniartitaanermi misilittakkanik paarlaasseqatigiinneq
Antorinip Nunatsinnut tikeraarnermini siunertaraa Nunatsinni ilinniartitaanerup iluani misilittakkanik aammalu Danmarkimit misilittagaasunik paarlaasseqatigiinnissaq.
-Ukiuni amerlasuuni ilinniartitaanerup iluani assigiimmik atuartitseriaaseqarpugut, tamannalumi ingerlaannassaaq. Maanilu Nuummi ilinniarfeqarfinnik assigiinngitsunik suleqatima takutisitsinera nuannaarutigeqaara. Nuannaajallannaqaarlu kalaallit inuusuttut amerlasuut ilinniarfeqarfinni aallartittarnerat, taakummi Kalaallit Nunaata siunissaani tunngaviulluassapput, Christine Antorini oqaluttuarpoq.
Palle Christiansenilllumi Danmarkimit tikeraarneqarneq aamma nuannaarutigeqaa. Danmarkimi suleqatigalugu ilinniarfinnik qanimut suleqatigiinnissanik periarfissaqarluartoq takusinnaavaa.
-Ilinniartitaanermut ministerimut saqqummiussaqarpunga. Kalaallillu Nunaanni inuusuttut ilinniaqqinnissaminni Danmarkimut ilinniariartarnissaannik atorfissaqartitsineq suleqatinnit paasineqarluarpoq. Taamaalillunimi qaffasinerusumik ilinniarsimasut amerlanerusut nunatsinni pigilerneqarsinnaammata. Tamuta saniatigut aamma pissanganarsimaqaaq Nunat avannarliit atuarfimmik nutaamik pilersitsiniarnerat Danmarkimit peqataaffigineqartoq tusarfigalugu, Palle Christiansen oqarpoq.
Christine Antorinip nunatsinniinnermini pissarsiarisani Danskit naalakkersuisoqarfiat peqatigalugu suliareqqittussaassavai, taamatullu aamma Palle Christiansenip isumassarsiat nutaat pissarsiani nunatsinni naalakkaersuisut inatsisartullumi peqatigalugit suliareqqissavai. Tamannalu ukiaanerani ataatsimiinnermi aamma pisinnaavoq.
-Ilinniartitaaneq pitsanngorsaaviginiarlugu siunniussagut suliareqqissavagut. Taamalillutami qulakkeersinnaavarput meeqqat atuartinneqarnerminni aallartiluarnermikkut kingorna perornerminni ilinniagarissaarlutik inuiaqatigiinnilumi iluaqutaalluarlutik inissismanissaat, Christine Antorini, aqagu Danmarkimut angerlartussaq taama naggasiivoq.
