VIDEO Ilinniarfinnik nittarsaassineq inuusuttunit isumassarsiorfigineqartoq
Grønlandsbanken, Air Greenland suliffeqarfiillu allat 22-t nittarsaassinermut ukiut tamaasa ingerlanneqartartumut peqataapput.
- Ilinniaqqinnissamut paasissutissanik nutaanik pissarsivunga.
- Peqqissaasunngorniarneq imaluunniit peqqinnissaqarfiup iluani allatigut ilinniagaqarsinnaaneq pissanganartippara, Nikkia Grønvold KNR-imut oqarpoq.
- Aquttut suut suliarisarneraat paasivara, assartugassalerisutullu atuarusunnikuugama taakku sulerisarnersut aamma paasisaqarfigalugu, Malik Lyberth oqaluttuarpoq.
Nittarsaassineq ilinniartuniinnaq soqutigineqanngilaq, aammali suliffeqarfiit peqataasut iluaqutigilluartarpaat.
- Ilinniartut iluamik oqaloqatigineri assut iluaraarput. Nuanneqaaq.
- Ilinniartut qaninnerulaarlugit, oqaluttuarinerulaarsinnaallugu sooq Royal Arctic Line pitsaasoq. Talittarfiuinnanngilaq, umiarsuaannaanngillat, suliffiit ikattorujussuupput taavalu aamma ilinniartut pikkorissut qinnuteqartikkusukkatsigit, Line Poulsen, suliffeqarfimmi ilinniartitaanikkut ataqatigiissaarisoq taama oqaluttuarpoq.