Politikerit ilinniakkat taamaatiinnarneqartut pillugit akisussaasuliiniartut
Nuummi Niuernermik Ilinniarfimmi ilinniarfinnik marlunnik aallartingajaleraluartunik taamaatitsisoqarmat, politikerit nuiamasut arlallit sakkortuumik isornartorsiuipput.
- Demokraatini isumaqarpugut kina akisussaanersoq paasisariaqartoq. Uangutsinnut malunnarpoq arlaata arlaani suliassani suliarisimanngikkai tamannalu ilinnialersussanut pisuussuteqanngitsunut kinguneqarnerluppoq, Demokraatineersoq Nivi Olsen paragraf 37 atorlugu apeqquteqaammi allappoq.
Inuit Ataqatigiinneersup Sofie Geislerip pisoq kanngunartuliatut taavaa. Naalakkersuisut akisussaaffik tigusisariaqaraat taanna isumaqarpoq.
Aamma Suleqatigiissitsisuneersoq Tillie Martinussen sakkortuumik isornartorsiuivoq, tusagassiuutinullu nalunaarummi allalluni, Naalakkersuisut ilinniarfiit aallartisinniarlugit Niuernermut Ilinniarfimmut aningaasalersuinissaminnik salliussinnginnamik "pisortanit ikiorserneqartartut amerliartortipilooraat".
Aningaasanut inatsimmi aningaasaliiffiunngitsut
Aamma Partii Naleqqameersoq Pele Broberg ilinnialertussaagaluartut aqqaneq-marluk ilinniarnissaminik arlaanni periarfissinneqarniarnersut pillugu Naalakkersuisunut apeqquteqaateqarpoq.
Politikerilli allallu akissutissarsinissaminnut utaqqeqqaartariaqassapput. Tassami Nuummi Niuernermik Ilinniarfik Naalakkersuisullu inuusuttut aqqaneq-marluk maanna ilinniarfissaqanngitsut pillugit tamakkiisumik akisussaajumanngillat
Ilinniartitaanermut naalakkersuisoqarfiup Niuernermik Ilinniarfik pisuutippaa. Niuernermik Ilinniarfiup ilinniarfinnik marlunnik neqerooruteqarnissaminut akuerineqarsimanngitsoq, ilinniarfiillu aningaasanut inatsimmi aningaasalersorneqanngitsut naalakkersuisoqarfik KNR-imut mailikkut allappoq.
AAMMA ATUARUK Ilinniartut aqqaneq marluk pakatsingaatsiartut: Ilinniarfissaat nutaat taamaatiinnarneqartut
Nuummi Niuernermut Ilinniarfiup ilinniarfiit akuerineqarnissaat qulakkiiveqqaarsimassagaluaraa ilinniarfiup siulersuisuisa siulittaasuata Karsten Lyberth Klausenip nassuerutigaa.
Karsten Lyberth-Klausenilu naapertorlugu, ilinniarfiit marluk aallartinnissaat pillugu naalakkersuisoqarfik Niuernermik Ilinniarfillu paaseqatigiissimasut.
Ilinniarfiit marluk taamaatiinnarneqartut tassaapput Nunat tamat akornanni niuernermik bachelorinngorniarfik aamma Aningaasaqarnermik nukissatigullu sillimmatinik aqutsinermik bachelorinngorniarfik
Tamannali pillugu naalakkersuisoqarfik KNR-imut ima allappoq.
- Ilinniarfimmik aallartitsinnginnermi ilinniarfissap imarisaanut aningaasalersornissaanullu akuersisoqaqqaassaaq. Ilinniarfiit ataatsimiinnerni assigisaanniluunniit oqaloqatigiissutigineqarsimappata naammanngilaq.
Susoqarsimanersoq pillugu maanna misissuisoqarpoq. KNR-ip ilinnialertussaagaluartut aqqaneq marluk kimit akisussaaffigineqarnersut pillugu apeqqut naalakkersuisoqarfimmit Niuernermik Ilinniarfimmiilluunniit erseqqissumik akissutissarsinngilaa.
AAMMA ATUARUK Alexander ilinniarluni aallartittussaagaluarpoq: Pakatseqaanga
