Ilinniakkamik aallartitsisut unitsitsiinnartarnerat annikillisarniarneqartoq
Inatsisilerituutut ilinnialersoq Lykke Lynge Ilisimatusarfimmi ukioq manna ilinnialersut 193-iusut ilagaat. Taassuma Ilisimatusarfimmi ilinniarnerminik unitsitsiinnarumanani ilinniarnermi nalaani oqaloqateqarnissani pisariaqalissagaluarpat periarfissat atorluarusuppai:
- Tassa eqqarsaatigisupilussooreernikuuara uniinnannginnissaq taanna angorusullugu, taavalu pingaartillugu ilinniaqatit ingerlaqatit ataqatigiilluarnissaat anguneqarnissaa, taamaasilluni ataatsimut kaammattoqatigiilluta ingiaqatigiissinnaassagatta, Lykke Lynge oqarpoq.
Taassuma nunatsinni inatsisilerituutut ilinniarsinnaanngornini nuannaarutigaa.
- Taavalu aamma minnerunngitsumik tamaani periarfisssaanera oqaloqateqarsinnaaneq inuttut killiffimmik ajornartorsioraanni immaqaluunniit pisariaqartitsigaanni coaching immaqaluuniit psykologit oqaloqatiginissaat, Lykke Lynge taama oqarpoq.
AAMMA ATUARUK Inatsisilerituunngorniarneq nutaaq soqutigineqarluartoq
Ilisimatusarfimmi ukioq kingulleq 131-t aallartipput, taakkunanngalu 24 procentit ilinniarnerminnik unitsitsereerput. Taamaammat Ilisimatusarfimmi rektori naapertorlugu ukioq manna immikkut piareersaateqarlutik ukioq ilinniarfiusoq aallartippaat ilinniakkaminnik unitsitsiinnartartut amerlavallaartarmata.
- Siunnersortissat arlariit immikkoortortaqarfinnit marlunnit sisamat tungaannut aallartipput, tassanilu ikiuisussaassallutik ilinniartuni nutaanik. Nalorsartarmata aamma Ilisimatusarfimmi inuuneq nutaarluinnaq aallartinneqartarmat, taamaammat ukua neriuppugut atorluarneqarumaassasut ilinniartunit nutaanit, Gitte Adler Reimer taama oqarpoq.
Ilisimatusarfimmi ukiup ilinniarfiusup aallartinnginnerani ilinniarnissaminnik akuerisaasimasut danskit tuluillu oqaasiinik kiisalu ilinnialernissamik piareersarneqarnissaminnik akeqanngitsumik neqeroorfigineqarput.
