Ilimanami suliniut killiffissiorneqalerpoq

Ilimanami suliniut, Nunatsinni illorsuit pisoqaanersaasa ilaannik ataatsimiittarfinngortitsinissamik neriniartarfinngortitsinissamillu, taakkualu saniatigut illuaqqanik nutaaliaasunik unnuisarfinnik 15-inik sanaartorfiusussami, nunaqarfimmilu aqqutigissaanissamik kuuffilersuinermillu, kiisalu talittarfimmi iluarsaassinissamik malitseqartussaq ukiarmi oqallisigineqangaatsiarlunilu aalassatsitsigaatsiarpoq.

Tamanna pivoq Qaasuitsup Kommuniani borgmesteri, Ole Dorph, Ilimanami suliniut pillugu Ilimanami innuttaasunik ataatsimiisitsinermi inuinnartut najuunnerarluni suliniummut tapersersuinnginnini ataatsimiisitsinermi ersersimmagu.

Innuttaasunik ataatsimiisitsineq Ilimanami, 60-it missaanik innuttaqartumi, katersortarfimmi ingerlanneqassaaq, Qaasuitsup Kommunia aaqqissuisoralugu.

Ilimanami suliniut taamatut isikkoqartillugu ingerlateqqinneqartariaqartoq Qaasuitsup Kommuniani kommunalbestyrelsip tamarmiusup novembarip naanerani matoqqasumik ataatsimiinnermi aalajangiuppaa.

Ilimanaq pillugu suliniummi Realdania Byg, World of Greenland aamma Qaasuitsup Kommunia ataatsimoorlutik isumaqatigiissuteqarput tamarmik immikkut suliniummut tapersiissuteqarnissaminnik. Kommuuni talittarfiup pitsanngorsarnissaanut, kuuffilersuinissamut inuinnaallu aqqutaannik pitsanngorsaanissamut suliassaqarpoq. World of Greenland illuaqqanik 15-inik sanaartortitsissaaq. Realdania Bygilu illorsuarnik pisoqqanik marlunnik nutartaassaaq.