Ileqqorissaarnissamik siunnersuisoqatigiit naartuersinnissamut killigititaasup sivitsornissaanut ilaliisut

Naartusut naarmioqarnermik misissortereernermi naartuersinnissamik naartuersinnginnissamilluunniit eqqarsarfissaat sivitsoqqunarpoq.

Taamaammat naartuersinnissamut killigititaasup sapaatit akunneri aqqaneq-marlunniit 18-inut sivitsorneqassasoq, Danmarkimi ileqqorissaarnissamik siunnersuisoqatigiinni, Det Etiske Råd, amerlanerussuteqartut ilaliipput.

Naartuersinnissamut killigititaasoq sapaatit akunneri 18-inut sivitsorneqarpat naartusut naarmioqarnermik misissortereernermi naartuersinissamik naartuersinnginnissamilluunniit eqqarsarfissaqarnerulernissaat, siunnersuisoqatigiinni amerlanerussuteqartut ilaliinerminnut tunngavilersuutigaat.

Tarnip nappaataanik ilisimatooq, Merete Nordentoft, siunnersuisoqatigiinni amerlanerussuteqartunut qulingiluaasunut ilaavoq. Naartusut nammineq aalajangiisinnaatitaanissaat, taassuma pingaartippaa.

- Arnat naartuersissanerlutik naartuersissannginnerlutilluunniit naartulerneranniit eqqarsarfissaat sapaatit akunneri 18-inut sivitsoqqunaqaaq.

- Naartusorli qanoq naartuersissanersoq nassuiarneqaqqissaassaaq, naartuersinniarnanilu aalajangerpat ikiorneqarnissamik neqeroorfigineqassaaq, taanna oqarpoq.

Naarmiuni piikkani uumassuseqartoqartartoq

Siunnersuisoqatigiinni ilaasortat 17-iupput, taakkunanngalu sisamat naartuersinnissamut killigititaasup sapaatit akunneri 15-inut sivitsornissaanut ilaliipput.

Siunnersuisoqatigiit siulittaasuat, Leif Vestergaard Pedersen, taakkununnga ilaavoq.

- Naartusup nammineq aalajangiisinnaatitaanissaa pingaaqaaq. Naarmiuali aamma eqqarsaatigisariaqarpoq.

Naartulernermiit sapaatit akunneri aqqaneq-aappassaanni piikkat 15 procentiisa missaat uumassuseqartartut taakkualu naartuersinnissamut killigititaasup sapaatit akunneri 15-nit amerlanerusunut sivitsorneqarpat qularnanngitsumik amerlissasut, taanna oqarpoq.

Naartuersittut amerlanerpaartaat naartulernermiit sapaatit akunneri arfineq-aappassaanni arfineq-pingajussaanniluunniit naartuersittartut

Siunnersuisoqatigiinni ilaasortani sisamat naartuersinnissamut maanna killigititaasoq allanngortikkusunngilaat. Danmarkimi napparsimmaviit ilaanni, Nordsjællands Hospitalimi, ernisunut nakorsaq, Ida Donkin, taakkununnga ilaavoq.

- Naartusut amerlanerpaartaasa naartullutik paasiaartarpaat, naartuersittullu amerlanerpaartaat naartulernerminniit sapaatit akunneri arfineq-aappassaanni arfineq-pingajussaanniluunniit naartuersittartut, taanna oqarpoq.

Det Etiske Råd erinitsaanneqareerluni oqaaseqaaminik saqqummiussivoq. Suliniaqatigiiffippaat, soorlu Mødrehjælpen aamma Sex og Samfund, naartuersinnissamut killigititaasup sivitsornissaanik nukingisaarisunut ilaapput.

Ernisunut nakorsarpaat arnallu kinguaassiutaannut nakorsat nukingisaarisunut aamma ilaapput.