Suliniaqatigiiffik Sex & Samfund: Naartuersinnissamut killissarititaasoq sapaatit akunneri 18-inut sivitsorneqartariaqarpoq
Danmarkimi naartuersissinnaaneq ukiut 50-it matuma siornagut atuutilerpoq. Taamanerniillu naartuersinniaraanni sapaatip akunneri aqqaneq marluk qaangiutsinnagit naartuersittoqartanissaa piumasaqaataavoq.
Danmarkimi suliniaqatigiiffimmit Sex & Samfundimeersut isumaqarput sapaatit akunneri aqqaneq marluk qaanngiutsinnagit naartuersissimanissaq ineriartornermut malinnaatinneqarsimanngitsoq, minnerpaamillu sapaatit akunnerinut 18-inut sivitsorneqartariaqartoq.
- Naartuersinnissamut killissarititaasoq assigiinngitsunik isummersorfigineqartarpoq. Uagullu arnat pitsaanerpaamik pisinnaatitaaffeqarnissaat qimerloorumavarput.
Sex & Samfundimi allattaaneq Majbrit Berlau oqarpoq.
AAMMA ATUARUK Naartuersissinnaaneq USA-mi West Virginiami inerteqqutiginiaraat
Naartuersittarneq pillugu malittarisassat, sapaatillu akunneri aqqaneq marluk qaangiutsinnagit naartuersissimanissamik piumasaqaatip allanngortinneqarsinnaaneranik innersuussuteqarsinnaaneq nalilersorneqassasoq, Danmarkimi Ileqqorissaarnissaq pillugu siunnersuisoqatigiit Jyllandspostenimut decembarimi oqaatigaat.
Arnat 18-inik ukioqalersimanngitsut katissimanngitsullu naartuersinnissaannut angajoqqaavisa akuertinneqaqqaartarnerat allattaanerup erseqqissaatigaa.
Arnalli 15-inik ukioqalereersimasut aatsaat akuersiteqqaarlugit naartuerneqarsinnaapput, tamatumani angajoqqaat kisimiillutik aalajangiisussaatitaannginnerat taassuma aamma erseqqissaatigaa.
