Ilaqutariit Langekkut kommunimut ilungersuuteqarnerminni tunniutiinnartut
Tapersersorneqarnissaq taanna Masaanap arnaata Magdaline Langep kommunimut iluatsinngitsumik noqqaassutigisimagaluarpaa.
Arfinilinnik ukiullip Masaanap nagguai peqeqqajaasorujussuupput, tamannalu ineriartorneranut aamma kigaalaqutaavoq. Anaanaasup Magdaline Langep Masaana ineriartornermini pingasunik ukiulittut oqaatigineqarsinnaasoq nalilerpaa, Masaanalu nalinginnaasumik inuuneqassaguni ulluinnarni sungiusarneqarnissamik tapersersorneqarnissaminillu pisariaqartitsivoq.
- Meeqqani tapersersorteqarpoq. Mikinerugallarami nerinialernermini ikiorteqartarpoq. Massakkut nammineq nerisarpoq. Tapersersortaata suli ikiortariaqartarpaa, soorlu atisalersornissaanut, atisaajarnissaanut WC-mukassappat ilitsersuullugu imaluunniit ikiortariaappat ikiorlugu.
Magdaline Lange, naapikkatsinni panimminik ukiup affaanik ukioqartumik kissumiartoq, Masaanap eqqortumik ikiorserneqarnissaanik Kommuneqarfik Sermersuumut ilungersortuarpoq. Ilungersorneq taanna Magdaline Lange naapertorlugu kommunip ataqatigiissaarilluannginneranik iliuuseqanngineranillu pissuteqartoq.
- Kommuni ulluuneranilu paaqqinnittarfik suleqatiginiaraluarpakka, tamannali ajornakusooqaaq. Tamatigungajak tuavisaagassaapput immikkoortoqarfiilluunniit arlallit attaveqarfigisassaallutik. Ernitsinnik sullissisut tamaasa nammineq attavigisariaqartarpagut, Magdaline Lange oqarpoq.
Ilaqutariit Masaanap aalajangersimasumik tapersersorteqalernissaa ukiup affaani utaqqivaat. Aamma ulluinnarni ikiorsiissutitut atortussaanik atuarfimmilu immikkut atuartitsiffiusumi inissaqarnissaa qinnutigisimavaat. Masaanali maannamut taarseraattunik Masaanamullu piffissaqanngitsunik tapersersorteqarpoq, ikiorsiissutissatullu atortussaqartinneqarani.
AAMMA ATUARUK Innarluutillit illersuisuata isornartorsiuinera kommuninit isumaqatigineqanngilaq
Danmarkimi pitsaanerusoq
Ilaqutariit 2015 tikillugu Danmarkimi najugaqarneranni Masaanap pisariaqartitaanik ikiorneqartartut, Magdaline Langep oqaatigaa. Masaanallu ineriartornissaa kommunip isumagaa.
Magdaline Langeli naapertorlugu maani killormorluinnaq pisoqarpoq, namminerlu kommunimut ilungersornermini maanna tunniutiinnarsimavoq.
- Itigarteqqinneqarnissamut nukissaarukkama.
Masaanap arnaa aggustip qaammataani naggammik misiliilluni Kommuneqarfik Sermersuumi meeqqanut ilaqutariinnullu immikkoortortaqarfimmut naammagittaalliuummik allagaqarpoq, ima allalluni:
”Oqarpusi meeqqat siunissaraagut, kisianni sooruna meeqqat siunissaqartilernissaannut ikiuutinngilasi? Pissutsit akuerigajuppakka, Masaanali qanoq ittoq takullugu unammilliinnassaanga. Ilumut ikiorneqassaagut naqqinneqqaassaagut?”
AAMMA ATUARUK Innarluutillit pillugit oqallinnermut kommunit peqataasariaqarput
Magdaline Lange naammagittaalliiormalli qaammat ataaseq maanna qaangiussimalerpoq, sulili tusagaqanngilaq.
Kommuneqarfik Sermersooq innarluutilinnut susassaqarfimmi sapaatip akunnerata siuliani ajornartorsiuteqannginnerarpoq.
Kommuni KNR-imit qinnuigineqarpoq Magdaline Lange isornartorsiutaanut akissuteqaqqullugu.
