Ikorfartuutit inunnut innarluutilinnut sapaatit akunneqartitsinermi ukkatarineqarniartut
![](/sites/default/files/styles/image_934x467/public/2024-09/20240731-151621-L-1920x1280web.jpg?h=4ee5b110&itok=QMpLD6ps)
Nunatsinni inunnik innarluutilinnik sullisseriaatsip nalilersorneqarnerata tusagassiofinni, nalunaarusiani, ataatsimiititaliani politikerillu akornanni sammineqangaatsiarnera, tamatuma naalakkersuisunit ukkatarineqarneruneranik kinguneqarpoq.
Sapaatit akunnerisa 41-ssaammi inunnut innarluutilinnut sapaatit akunneritippaat, inuillu innarluutillit ulluinnarminni pitsaasumik atugaqaqqullugit nammineersinnaanerunissaat sapaatit akunneranni tassani ukkatarineqartarpoq.
Tamannalu naalakkersuisut inuit innarluutillit pillugit politikkiat aallaavigalugu pissasoq, meeqqanut inuusuttunullu naalakkersuisoq Aqqaluaq B. Egede taama oqartoq tusagassiorfinnut nalunaarummi allaqqavoq:
- Inuit ataasiakkaat piginnaasaminnik piviusunngortitsinissaminnut inuiaqatigiinnilu peqataanissaminnut periarfissaqarnissaat, Naalakkersuisut innarluuteqarnermut politikkiata ilaatigut aallaavigaa.
Aporfiit sapinngisamik ikilisarlik
Taamaammat inunnut innarluutilinnut ulluinnarni atortorissaarutit ikorfartuutillu atugarissaarnerunissaannik qularnaarutaasinnaasut taakkununnga sapaatit akunneqartitsinermi immikkut ukkatarineqartarput.
Tassa inuit innarluutillit ulluinnarni inuuneranni ataatsiakkaatut aammali inuiaqatigiittut qanoq oqilisaassinnaanerivut matumani pineqarpoq.
Nunatsinnimi inuit innarluutillit aporfiisa sapinngisamik ikilisarnissaat pingaaruteqartoq, Aqqaluaq B. Egedep oqaatigaa.
- Inuit piginnaasakinnerulersimasut timikkut ersinngitsutigullu ulluinnarminni aporfeqartarput, taamaammallu inuiaqatigiittut innuttaasunut tamanut ilanngutititsinerusutut suli ineriartuaarnissarput pingaaruteqarpoq, taanna oqarpoq.
Aaqqissuussinissamut tapiiffigineqarnissamik qinnuteqartoqarsinnaasoq
Kikkulluunniit ikorfartuutinik teknologiinillu ulluinnarni inuunermi atukkatigut ikiuutaasimasunik atuinermik misilittakkaminnik inunnut innarluutilinnut sapaatit akunneqartitsinermi avitseqateqateqarnissaannik, Isumaginninnermut Aqutsisoqarfimmit kaammattorneqarput.
Innuttaasut susassaqartullu attuumassutillit ulluinnarni atugarissaanerunissaq nammineersinnaanerunissarlu qitiutillugit aaqqissuussinissamut tapiiffigineqarnissamik aamma qinnuteqarsinnaapput.
Kikkulluunniit taama aaqqissuussinissamut tapiiffigineqarnissamik Isumaginninnermut Aqutsisoqarfiup nittartagaani socialstyrelsen.gl-imi qinnuteqarsinnaapput. Qinnuteqarnissamut sapaammi septembarip ulluisa 22-at piffissaliussaavoq.