Professori: Aalisarneq naammassisaqarfiulluartoq inuiaqatigiinnut iluaqutissartaqarnerussaaq
Qineqqusaarnermi apeqqutit annerpaat ilaat tassaavoq aalisarneq pillugu inatsisissaq nutaaq, Inatsisartut ukiaanerani ataatsimiinneranni siullermeerneqartoq, partiinit qanoq piniarneraat. Siumup Partii Naleqqallu inatsisissatut siunnersuut pisassiissutinik piginnittuunermik amerlanerusunut siammaanissamik ilaatigut siunertaqartoq tapersersorlugu oqaatigereerpaat.
Inuit Ataqatigiit qineqqusaarutiminni allapput pisassiissutinut nutaamik aaqqissuussisoqassasoq, "pisasseeriaatsimik aalisarnermit isertitanik naapertuunnerusumik agguaariaasiliisumik pisassiissutinillu piginnissinnaanermut tamat oqartussaaqataaffiginninnermik siammasinnerusumik isumaqatigiissuteqartariaqarpugut."
AAMMA ATUARUK Aalisarnermi sinneqartoorutit unioqqutitsinertaqanngitsumik nuunneqartarput
Naammassisaqarsinnaanerup qaffasissuunissaa pingaaruteqarpoq
Aalisarnerulli siammarnissaa ajornakusoorsinnaavoq, illuatungaanimi politikerit inuiaqatigiinnik atugarissaartunik ineriartoritsinissamut aningaasanik pisariaqartitsimmata, Aningaasaqarnermut Siunnersuisoqatigiinni siulittaasoq aningaasaqarnerlu pillugu professori, Torben M. Andersen, taama naliliivoq:
Kalaallisut nal. 19.30, danskisullu nal. 21
- Aalisarnermi naammassisaqarsinnaanerup sapinngisamik annertunerpaaffimmiitinnissaa pingaaruteqarluinnartuuvoq. Taamaaliornikkummi inuiaqatigiinnut iluaqutissartaasoq annerpaaq anguneqarsinnaammat, Torben M. Andersen oqarpoq.
Tamannalu aalisarnermuinnaanngitsoq inuiaqatigiinnili allani aamma pitsaasunik sunniuteqarsinnaavoq.
- Pisuussutinik isumatusaartumik atuinissap qulakkeernissaanut periaaserineqartoq, sulisussaqarnissarlu, allatigut atorneqarsinnaavoq nunamilu inuussutissarsiornikkut siammasinnerusumik toqqammavissaqartitsilluni, Torben M. Andersen taama oqarpoq.
Aalisarnerlu pillugu inatsisissatut siunnersuummi aqqutissatut siunniunneqartoq politikerinit atorneqassappat, tassalu amerlanerusut aalisarnermut akuutinneqarnissaat, taamaaliornikkullu inuussutissarsiuummi naammassisaqarsinnaaneq millisillugu, taava Namminersorlutik Oqartussat namminneq naatsorsuinerisa takutippaat nunatta karsiata aningaasatigut isertitai ikinnerulissasut.
Sipaarniarnermi sanngiinnerusut eqqugaanerusartut
Tamannalu nunatsinni sanngiinnerpaanut kinguneqartitsisinnaavoq:
- Nalinginnaasumimmi imaappoq Namminersorlutik Oqartussat, taamatullu aamma kommunit aningaasartuutaat inuiaqatigiinni sanngiinnerusunut iluaqutissanngortinneqartarmata. Sipaarniartoqartariaqassappallu tamatuma pingaartumik sanngiinnerusunik eqquinissaa qaninnerussaaq, Torben M. Andersen taama oqarpoq.
AAMMA ATUARUK Aalisarnermi sinneqartoorutit unioqqutitsinertaqanngitsumik nuunneqartarput
