Odensemi Kalaallit Illuutaata ghettomut nuunnissaq mianersoqqussutigaa
Lars Løkke Rasmussenip Danmarkimi inissiarsuit ajornartorsiorfiunerpaasut isatertinniarpai najugaqartullu siammarlugit nutsertillugit.
Tamannalu kalaallinut inooqataanikkut ajornartorsiortunut arlalinnut, ilaatigut Odensep ilaani Vollsmosemi najugaqartunut sunniuteqarsinnaavoq.
Vollsmose najugaqarfiit 22-t danskit naalakkersuisuisa 2017-imi "ghettonut allattorsimaffianniittut" ilagivaat.
AAMMA ATUARUK Århusimi klostertovi eqqissisimanarnerulersoq
Najugaqartut danskisut innuttaassusillit najugaqarfimmi aalajangersimasumiittut sumiuunerat kommunit nalunaarsorneq-ajorpaat. Odensemili Kalaallit Illuutaat naapertorlugu, kalaallit ikinnerpaamik 50-it Vollsmosemi najugaqarput.
Kalaallit Illuutaatalu kalaallit Vollsmosemut nuunnissaat mianersoqqutigisarpaa.
- Inissarsiortoqartillugu Vollsmosemut nuuttoqannginnissaa kaammattuutigisarparput, Vollsmosep ilaa nuanninngitsunik misilittagaqarfigigatsigu, taamaattumillu innuttaasut allamut inissarsioqqusarlugitigit, Odensemi Kalaallit Illuutaanni pisortaq, Kirsten Mærsk, KNR-imut taama oqarpoq.
Najugaqarfeqarfik alla, Odensemi Kalaallit Illuutaata sullissiffigisaata ataaniittoq tassaavoq Esbjergimi Gl. Vardevej. Najugaqarfeqarfik danskit naalakkersuisuisa ghettonut allattorsimaffianniinngikkaluarpoq, kalaallilli inooqataanikkut ajornartorsiortut amerlangaatsiartut tassani najugaqarput, Odensemi Kalaallit Illuutaat taama paasissutissiivoq.
Sioorasaarisoqarlunilu nakuusertoqartartoq
Pisortap Kirsten Mærskip Løkkep nalunaaruteqarnera oqaaseqarfigerusunngilaa, oqarlunili:
- Oqaatigiinnarsinnaavarput Kalaallit Nunaanni innuttaasut Danmarkimut nuukkaangata sapinngisamik pitsaanerpaamik atugassaqartinnissaat pingaartittupilussuugatsigu. Toqqissisimaffiusumullu nuunnissaannik siunnersorniartarpagut.
AAMMA ATUARUK Angerlarsimaffeqanngitsut samminngippallaarpagut
Vollsmosemi inissiat atorneqanngitsut akikitsullu pissarsiariuminarput. Kalaallilli tassani najugaqartut arlallit illoqarfiup ilaani allamiunit immikkoortitaasarlutik nalaattarsimavaat.
Odensemi Kalaallit Illuutaanni sulisut aamma illoqarfiup ilaanukaraluarlutik utiinnartariaqartarsimapput najugaqartunit nilliaffigineqartaramik.
- Nuanninngitsunik misilittagaqarfigaarput, Vollsmosemi najugaqartut ilaat uumisaarneqarlutillu pitsaanngitsumik pineqartarmata. Taamatullu atugaqartitaasut atugarliorliulersarput kingornalu nuukkusulersarlutik.
Ghettonik isaterinissaq aatsaat oqallisigineqalinngilaq
Løkkep ghettot iliuuseqarfiginiarlugit 2010-mi aamma oqaatigereerpaa, soorlu aamma Anders Fogh Rasmussen 2004-mi ministeriunermi nalaani aamma taamaaliortoq. Taamaakkaluartoq najugaqarfeqarfiit 22-t danskit naalakkersuisuisa ghettonut allattorsimaffianni suli allaqqapput.
Odensemili borgmesterip Peter Rahbæk Juelip (S) nalunaarutigaa najugaqartut sumut nuutsinneqarnissaannut naalakkersuisunit ikiorneqarnerunngikkunik Vollsmosemi inissiarsuarnik isaterisoqassanngitsoq.
AAMMA ATUARUK Inuttut ajornartorsiuteqartut ikiorneqartariaqarput
Ministeriunerulli oqaatigisaa kommuninit ghettoqarfiusunit malinneqanngikkaluarpalluunniit, Kirsten Mærskip kaammattuutigaa najugaqarfik nuuffiginnginnerani misissuiffigeqqaarneqartassasoq. Minnerunngitsumik Kalaallit Nunaannit Danmarkimut nuuttoqassatillugu.
- Inissiamut qularnaveeqqusiissummut kommunimit akiliunneqarsimagaanni allami inissarsinissaq ajornartupilussuusinnaavoq, inissiamummi allamut qularnaveeqqusiissummut akiliunneqarnissaq ajornakusoorsinnaammat. Taamaammat nuuffigereersimagaanni allamut nuunnissaq ajornartupilussuusinnaavoq aningaasassaqartinngikkaanni, pisortaq taama oqarpoq.
