Danmarkimi mattussinissaq nunatsinnik eqquisinnaasoq
Danskillu naalagaaffiata suliatigullu kattuffiit arlallit akissaatit pillugit isumaqatigiinniarnerisa ajalusoornerat nunatsinni kalaallinillu Danmarkimi najugaqartunik eqquisinnaavoq.
Ajalusoorneq maannakkutut ingerlaannassappat naalagaaffimmi sulisut apriilip sisamaaniit suliumajunnaassapput.
Illuatungeriit isumaqatigiinniarnerminni apriilip qulingani isumaqatigiissimanngippata ullormit tassannga naalagaaffimmi atorfillit 120.000-it mattunneqarnissaat Danmarkimi Aningaasaqarnermut ministereqarfiup danskillu nutaaliornermut ministeriata Sofie Løhdep (V) pingasunngormat nalunaarutigaat.
- Taamatut mattussinissaq annertuupilussuussasoq ilisimalluarpara. Periarfissamilli allamik takusaqarsinnaanngilanga, Løhde pingasunngormat tusagassiortunik katersortitsinermi taama oqarpoq.
DMI silaannakkullu angallanikkut sullissivik matuneqassapput
Suliumajunnaarnermut taarsiullugu mattussisoqarnera naalagaaffimmi sulisut akissarsiaqartinneqaratik angerlartinneqarnissaannik isumaqarpoq. Taamatullu pisoqarneratigut ilaatigut DMI-mi silasiortut eqqugaassapput Naalagaaffeqatigiillu tamakkerlugit silarlunnissaanik ilimasaarinerit upalungaarsimanissamillu kalerrisaarinerit aamma pisinnaassanatik.
Nutaaliornermut ministereqarfimmit oqaaseqaat naapertorlugu Nunatsinni silaannakkut imaatigullu angallattunik sullissisoqarunnaassaaq, Danmarkimilu timmisartoqarfinnut ilimasaaruteqaranilu nunani tamalaani silaannakkut angallannermut aamma ilimasaaruteqassanngilaq.
AAMMA ATUARUK Air Greenland suliumajunnaartoqarneranik eqqugaasoq
Suliatigut katuffiit ilaasortamik 15.000-iusut apriilip sisamaanit suliumajunnaarnissaannik kalerriuteqareerput. Naalagaaffiup akissarsianik qaffaanerunissaa pingaarnertut piumasaqaatigineqarpoq.
Suliumajunnaartoqarnerani ilaatigut meeqqat atuarfiini, efterskoleni, ilinniarnertuunngorniarfinni, inuussutissarsiutitigut ilinniarfinni aalajangersimasuni Danmarkimilu illoqarfiit anginersaanni universitetini ilinniartitsisut eqqugaassapput. Taamaammat ilinniartorpassuit, kalaallit Danmarkimi atuartut ilinniagaqartullu ilanngullugit, atuarsinnaajunnaassapput.
AAMMA ATUARUK Politiit sulinngiffeqarluni angalasarneq isumaqatigiinngissutigigaat
Ilinniarfeqarfiit matoqqasut napparsimmavissuarnilu upalungaarsimasuutitat
Aamma ulluunerani paaqqinnittarfiit peqqinnissaqarfillu malunnaatilimmik eqqugaassapput. Pingaaruteqarnerpaalli, soorlu assersuutigalugit ernisarfiit, ambulancet inuunermillu ulorianartorsiortunik pilattaanerit eqqugaassanngillat. BaneDanmark aamma eqqugaassaaq, qimuttuitsullu angalanerat tamarmi unitsinneqassalluni.
Naalagaaffiulli mattussinerani suliumajunnaarnermut naleqqiullugu sulisut amerlanerungaatsiartut eqqugaassapput. Sofie Løhdellu arlaannaalluunniit pinngitsoortikkusunnerugaluarlugu oqaatigaa.
- Taamatut mattussinissaq annertuupilussuussasoq ilisimalluarpara. Periarfissamilli allamik takusaqarsinnaanngilanga, Løhde pingasunngormat taama oqarpoq.
Naalagaaffiup suliatigullu kattuffiit isumaqatigiinniarneri Isumaqatigiissitsiniartarfimmi suli ingerlapput, isumaqatigiinniarnernullu tunngatillugu nipangiussisussaatinaaneq atuutsinneqarpoq.
