Aningaasanoorajuttut VM-eqarnerani unammilligassaqassasut
Kontumut 500 koruunimik ikisigit, 1000 koruunilu aningaasanoorutigalugu. Ullumikkut ilaasortanngoruit eqquiniarnerit akeqanngitsut qulit pissarsiarissavatit. Isikkamik arsaalluni VM-ertoqarnissaanut aallartisartoqaleruttorpoq, nittartakkatigut eqquiniaatitsivissut aamma aningaasanoortartunut neqerooruterpassuaqarput.
Isikkamik arsaalluni nunarsuaq tamakkerlugu aasaq manna pissartanngorniunnissat unammisunik akunnerpassuarni isiginnarluni isiginnaarutip saavaniinnissamik inuppassuarnut isumaqassaaq. Isikkamilli arsaalluni VM-ertoqarnissaa inuit ilaannut, eqquiniaanermik pinngitsuuisinnaajunnaarsimasunut taamaalinissamullu aarlerinartumiittunut aamma unammillernassasoq, Allorfimmi pisortaq, Birgit Niclasen oqarpoq.
AAMMA ATUARUK Pinnguaatinik aningaasanoornermillu pinngitsuuisinnaanngitsut amerlapput
- Eqquiniaasoq parafisimiittuusisinnaavoq uagulli ajorluinnartutut isigaagut.
Taassuma eqquiniaanaveersaarnissaq neqeroorutinillu sunnertinnaveersaarnissaq amerlasuunut ajornakusuussangatippaa.
- Eqquiniaasarnerit aqukkuminaatsereerukku taava tamanna immikkut aarlerinartortaqarpoq.
AAMMA ATUARUK Allorfik og banker arbejder sammen om at hjælpe ludomaner
Birgit Niclasen naapertorlugu nunatsinni eqquiniaanermik ajornartorsiuteqartut amerligaluttuinnarnerarpai. Qujanartumilli amerlasuut Allorfimmi katsorsartittarput pinngitsuuisinnaajunnaarnertillu anigortarlugu. Taakkuli aasaanerani imminnut noqinniarlutik aamma unammilligassaqassanerarpai:
- Eqquiniaarusunneq aasap ingerlanerani ussernartorsiortitsingaatsiassaaq, eqqarsaraannimi; Nalunngilara Danmark ajugaalersoq, taava eqquiniaanissamut ussernartorsiortoqalissaaq.
Piareersimanissarlu pingaaruteqarpoq:
- Eqqaamassutissiaaqqamik allagartalertoqarsinnaavoq. Eqquiniaanissamut ussernartorsiulissagaluaruma qanoq iliussaanga, Birgit Niclasen oqarpoq.
Pinngitsuuisinnaajunnaarsimasorisunut pinngitsuuisinnaajunnaarsimasumilluunniit ilisarisimasaqartunut neqerooruteqarpassuaqartoq, Allorfiup pisortaata oqaatigaa.
Allorfimmut oqarasuaammut 525343-mut sianertoqarsinnaavoq, Allorfiulluunniit immikkoortuisa arlaat attavigalugu. Aammattaaq ajornartorsiuteqarnerluni imminut misiliiffiusinnaasoq Allorfiup nittartagaatigut misilinneqarsinnaavoq.