VIDEO Ikiaroornartuerniat Inatsisartunit ikilisinniarneqarput

Inatsisartut ukiaanerani ataatsimiinneranni ikiaroornartoq pillugu oqallinnersuaqarpoq. Ikiaroornartuerniarnerup annikillisarnissaa akileraarutitigut eqqumaffiginninnikkut pissasoq ilaatigut siunnersuutigineqarpoq. Nuna tamakkerlugu periusissamik saqqummersitsisoqassasoq aamma siunnersuutigineqarpoq.

Aanngajaarniutinik unioqqutitsilluni aningaasarsiortoqartarnera akileraartarnermut aqutsisoqarfimmi immikkoortortaqarfeqalernikkut paasiniarneqartalissasut Inuit Ataqatigiinnit0 Inatsisartunut ilaasortap Agathe Fontainip siunnersuutigaa.

- Isumaqarama ikiaroornartumik atornerluineq akiorniaraanni vinkelit assigiinngitsukkaartussaapput, Agathe Fontain KNR-imut oqarpoq.

Aamma atuaruk VIDEO Hashimik atornerluinermut katsorsaaneq meeqqat atuarfiisa ilaanni iluatsilluartoq

Biilit akisuut, illut, angallatit anngajaat, piginnittorli suliffeqanngitsoq. Tamakkuupput akileraartarnermut aqutsisoqarfiup immikkoortortaqarfiata politiit suleqatigalugit misissuiffigilersinnaasai.

- Soorlu oqaatigineqartarpoq ilisimallugit inuit ukua isertitamikkut taama annertutigisumik aningaasartuuteqarnavianngitsut, Agathe Fontain oqarpoq.

Politiit taperserneqassapput

Hashi politiit arsaarinnissutaat

Hashi 183,5 kiilut politiit 2009-mi arsaarinnissutigaat. Taakkunannga 118 kiilu umiatsiami ataatsimi nassaarineqarsimallutik.

  • 2014-imi hashi 54,9 kiilut arsaarinnissutigineqarpoq
  • 2013: 73,7 kiilut
  • 2012: 50,8 kiilut
  • 2011: 39,4 kiilut
  • 2010: 36,1 kiilut

 

Maannali politiit akiuiniarnerminni suliaat naammaginartutut nalilerneqarput.

- Politiit sapinngisartik tamaat suliarisarpaat soorunami.

- Kisianni pitsaanerusumik angusaqarsinnaaneq aamma aqqutissiuunniarsarivara ugguunatigut siunnersuutitigut, Agathe Fontain oqarpoq.

Akileraartarnermut aqutsisoqarfiup politiillu qanimut suleqatigiinnerisigut hasheerniat ikilisinneqarsinnaasorineqarput.

- Naatsorsuutigivara neriuutigalugulu inuit taamatut ingerlatsinissartik tunuarsimaarfigissagaat, unitsissagaat allaat.

Aamma atuaruk Pinngitsaaliissummik misiligutissamik quisitsisoqartassanngilaq

Inatsisinut Ataatsimiisitaliap siunnersuutaa: 2016-ip ingerlanerani kukkunersiuinermik suliaqartarneq nukittorsarniarlugu akileraartarnermut tunngasunik kukkunersiuisarnermik misilittagaqarluartunik atorfinitsitsinissamut piareersaanerit aallarnisarlugit aningaasanik peqquserlullutik isertitaqartartut sammisarissallugit suliaqarnissaq, tallimanngormat Inatsisartunit akuersissutigineqarpoq.

Nuna tamakkerlugu periusissiaqalissasoq aappaagumut ukiaanerani ataatsimiinnissaannut piareereerneqassasoq Mimi Karlsenip siunnersuutaa aqagu marlunngornermi aappassaaneerneqassaaq.

Naalakkersuisuit periusissiamik sulinertik aallartereerpaat. Peqqissutsimut naalakkersuisup Doris Jakobsenip periusissiaq upernaaru Inatsisartut ataatsiminnerani saqqummiutissallugu naatsorsuutigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat