Arctic Sports: Ikerasammiut angusarissaarnersaallutillu pissuserinnersaapput

Nunaqarfik Ikerasak 200-ut 300-llu akornannik innuttaasoqartoq Arctic Sportsimi siuttunngoqqippoq – naak nunaqarfik timersortarfeqanngikkaluartoq.
Arctic Sports Ikerasak Arctic Sportsimi unammersuarnermi 22-nik peqataatitaqarpoq Assi © : Noah Mølgaard / KNR
Allattoq Noah Mølgaard
marsip 20-at 2023 12:50

Arctic Sportsimi Nunatsinni unammersuarneq arfininngormat naammassivoq peqatigiiffiit angusaasa katinnerat naatsorsorneqarluni. Ataasiakkaatut unamminermi aamma taama pisoqarpoq.

Nillialluni nuannattoqarpoq angusat katinneranni Ikerasak ajugaasuusoq højtalerikkut nalunaarutigineqarmat.

- Assorujuk peqatigiiffittut angusarissaanerpaanerput nuannaarutigaarput oktoberimi Ilulissani unammersuartoqarmat tamanna aamma angoreerlugu, Arctic Sports Ikerasammi siulittaasoq Kaaliina Therkildsen KNR-mut oqarpoq.

Ikerasak timersortarfeqanngimmat atuarfik sungiusarfiusarpoq. Init anginngillat atuarfiullu torsuusaa atorlugu kissassertoqartarluni. Atuarfiup initaasa portussusaat aamma killiliisinnaavoq qummut tukerseriaanermi one foot high kickimi. Nukappiaqqat pikkorinnerit 240 centimeter tukertarpaat niviarsiaqqanilu immikkuullarissumik pikkorissusilik Randi Zeeb Sigurdsen 214 centimeterimut tukersisarluni.

Qilaaq killiliivoq

One foot high kickimi tukerseriaasut isigak isimmitsissutaasoq tussutigisussaavaat aatsaallu nikorfarikkaanni periarneq akuerineqartarluni.

- Niviarsiaqqat ima pikkoritsigilersimapput tukerseriaranermi atuarfiup initaasa ilaanni qilaaq pukkippallaarluni, Arctic Sports Greenlandimi siulittaasoq Bolethe Stenskov KNR-mut oqarpoq.

- Ikerasammiullu ima pikkoritsigilernikuuppput Arctic Winter Gamesimi Nunarput sinnerlugu unammiartornerminni angusarissaartarluik, Bolethe Stenskov oqarpoq.

Tapersersorneqarluarput

Nunatsinnili unammersuarnerni peqataanissamut aningaasarpassuit katersugassaasarput. Ikerasammiut ukiormanna 22-llutik peqatapput aammalu unammersuarnerit ukiaq oktoberimi Ilulissani pimmata taamatut amerlassuseqapajaarlutik.

- Ukiup kaajallakkiartornerani katersuiniarnerit ingerlaavartarput piffissaarutilernermut utaqqinnagit, Kaaliina Therkildsen oqaluttuarpoq.

- Nunaqqativut qujamasunnartorujummik tapersersuisarput. Angajoqqaat ilaqutaasullu allat akussaat nammineq akilerlugit igaanik tuniniaanermi tunissuteqartarput taakkunanngalu isertitat tamarmik peqatigiiffitsinnut isertitaassutaasarput, Kaaliina Therkildsen oqarpoq, angusarissaarnermullu pissutaaqataanerarlugu siulersuisut sungiusaasullu akunnerminni suleqatigiilluarnerat.

Nersornaat nutaarluinnaq, tassalu pissuserissaarnerpaanut nersornaat Ikerasammiunut aamma tunniunneqarpoq.

Aappaagu unammersuarneq Qaqortumi pissaaq.

Andreas Johansen Tasiilameersoq angutit ataasiakkaarneranni angusarissaarnersaavoq allroundimik taaneqartartumi. Arnani Petra Amossen Uummannameersoq ajugaasuuvoq.