Savalimmiormiut arnartaat assammik arsarnermi VM-mut anngupput
Arnat assammik arsarlutik VM-rnissaat Tysklandimi Hollandimilu pisussaq decemberimi savalimmiormiunit peqataaffigineqartussanngorpoq.
Tamanna inissippoq sapaammi ualikkut Litauenimi nuna taanna baltiskimiittoq savalimmiormiunik tikeraartitsisuummat. Taanna unammeqqinneruvoq pingasunngormat kingullermik savalimmioriut namminneq arsarfimmi Litauen målinik qulinik ajugaaffigereeraat.
Sapaammi Litauen målimik ataatsimik ajugaavoq isertitalli katinneranni savalimmiormiut ajugaallutik VM-mi peqataasussanngorput. Savalimmiormiut ajorsarlutik pakatsisimaaleruttortut isiginnaariat suaartalerput VM-riartussanngornerarlugit.
- Tamanna paasilerlugu nuannaartorujussuanngorlutalu peqataasussanngornerput tulluusimaarutigaarput, savalimmiormiut nunanut allanut unammisartut anføreriat Pernille Brandenborg KNR-mut oqarpoq.
Inuusuttut akisussaaffimmik tigusipput
Qaammatit amerlanngitsut matuma siorna savalimmiormiut arnat assammik arsartartut EM-mi peqataapput maannalu tassa unammersuarnermut angisuumut allamut anngullutik.
- Arsartut arlallit Danmarkimi najugaqaramik tamaviaarnartunik unammisalerput. Aamma arsartut arlallit annertunerusumik akisussaaffeqalernikuupput isersimanerusalerlutillu. Ataasiakkaat eqqarsaatigalugit inuusuttut ineriartorluarput aammalu pikkorissiartorluarlutik, Pernille Brandenborg oqarpoq.
Savalimmiormiut Torshavnimi nutaamik timersortarfissuartaarnikuupput unamminerullu siulia pingasunngormat tassani pivoq. Isiginnaartut 3.000-it missaat nunanut allanut unammisartut kiataannik atortut nuannequtaalluartoralugit VM-mut anngussinnaanermut annertuumik alloriarput målinik qulinik ajugaallutik.
- Isumaqarpunga taakku assut kivikkaatigut tapersersuinertik malugitilluarlugu. Ilimagaara tamanna pissutaaqataalluinnartoq unammilluarluta målinik qulinik siuaqqalissutaasumik ajugaanitsinnut, Pernille Brandenborg oqarpoq.
Maajimi VM-mut makitsisoqassaaq. Taamaattumik savalimmiormiut suli naluaat kikkut unammiumaarnerlugit.
Kalaallit ukioq manna anngunniuteqataanngillat. Cuba kalaallit ajugaaffigereernikuusaat amerikap avannaamiut caribiamiullu anngunniunneranni annguttuuvoq.
