ICC-p siuttui Nuummi katersuupput
ICC-p siuttuisa Nuummi ulluni marlunni ataatsimiilerpata Kalaallit Nunaata IWC-mut atassuteqarnera sammisassat ilaginngitsoornavianngilaat. ICC-p siulittaasua Aqqaluk Lynge Kalaallit Nunaata aaffattassanik namminersuussilluni aalajangersaaneranut tapersersornissaanik noqqaassuseqassaaq.
ICC-p FN-imi suleqataaneranut Issittumilu Siunnersuisooqatigiinni sulineranut tapiissutit pillugit danskit nunanut allanut ministeriaqarfianut isumaqatigiissut ICC-p siulittaasuata Aqqaluk Lyngep qanittukkut atsiorpaa. Tamanna danskit nunanut allanut ministeriata Villy Søvndahlip Nuummut ukiarmi tikeraarnerani angusat tigussaasut ilagaat. Nunanut allanut ministeriaqarfiup ICC-mut tapiissutigisartagai 2011-mi unitsinneqarallarsimasut taamaasillutik 2016-ip naanissaanut ingerlaannartussanngorput.
Kalaallit Nunaat 2014-imi ataatsimeersuartoqarnissaata tungaanut ICC-mi siulittaasuuvoq. ICC-p nunanut tamalaanut siuttui qulingiluanik ilaasortaqarput, siulittaasullu saniatigut nunat ilaasortaasut tamarmik immikkut marlunnik ilaasortaatitaqarlutik. Nunat ilaasortaasut nikittaatsillugit ukiumut marloriarluni ataatsimiittoqartarpoq, kingullermi Ruslandimi Tjukotkami juulip qaammataani ataatsimiittoqarpoq.