ICC-p siulersuisuuneri Qaqortumi ataatsimiilersut

ICC-p siulersuisuuneri tallimanngornermi 26. aamma 27. august Qaqortumi ataatsimiissapput. Ataatsimiinnermi ilaatigut Naalagaaffiit Peqatigiinni Issittumilu Siunnersuisoqatigiinni suliat nalilersorneqassapput.
Allattoq Karsten Sommer
aggustip 26-at 2016 07:41

Siulersuisunut ilaasortat Alaskameersut, Canadameersut, nunatsinneersut Tjukotkameersullu eqqartugassaasa ilagaat, nunat tamalaat akornanni suliat saniasigut, naggueqatigiit Inuit aningaasaqarnikkut, ilinniartitaanikkut minnerunngitsumillu pisuussutinik uumassusilinnik atuinerat aqutsinerallu pillugit ataatsimeersuarnissanik piareersaanissaq. Ataatsimeersuartitsinissat 2017-imi 18-imlu pinissaat naatsorsuutigineqarpoq.

Talimanngornermi ataatsimiinneq ammarneqarpat Kommune Kujallermi borgmesteri Jærgen Wæver Johansen tikilluaqqusissaaq.

ICC-p Kalaallit Nunaani siulittaasuata Hjalmar Dahlip ilanngullugu nalunaarutigaa ICC-p siulersuisuisuunerisa Qaqortumiinnerat iluatsillugu Kommune Kujallermi aqutsisut aamma paasissutissiissapput, pingaartumik Kommunip ineriartornermi anguniagai minnerunngitsumillu aatsitassarsiornermut tunngasut pillugit.

Qaqortumut tikeraarneq naggaserlugu Upernaviarsuk savaateqarteqarfillu Kangerluarsorujoq tikeraarneqassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq