ICC-p puisit amiinut tunngatillugu EU sunnerniarsarissavaa
Ataatsimeersuarneq EU-mit aaqqissuunneqartoq taaguuteqarpoq ”What´s next for EU Arctic Policy” - EU-p Issittoq pillugu politikkiani suut tullinnguuppat - ataatsimeersuarnermilu peqataasussat ilagaat ICC-p nunatsinni siulittaasua, Hjalmar Dahl, taannalu aqagu oqalugiartussaavoq.
Taassumalu EU-p Issittumi Siunnersuisooqatigiinni alaatsinaattutut inissisimalernissaminik kissaatigisani iluatsinniassaguniuk qanoq-iliortariaqarnera qularutiginngilaa.
EU-p puisit amiinut tunngatillugu politikkini allanngortittariaqaraa
- Oqalugiarninni erseqqissaatigisassara tassaavoq EU-p puisit amiinut tunngatillugu politikkini allanngortittariaqaraa - Hjalmar Dahl Bruxellesimit taama oqarpoq.
Naggueqatigiit Inuit EU-p puisit amii pillugit killilersuilluni politikkianit ukiuni arlalinni eqqugaasimapput, ilaatigullu tamanna pissutigalugu EU Issittumi Siunnersuisooqatigiinni alaatsinaattutut inissisimalernissaminut aporfigisimavaa.
- EU Issittumi Siunnersuisuisoqatigiinni alaatsinaattunngorniaruni puisit amiisa EU-mi tunisaalernissaat siunertaralugu iluaqutissatsinnik iliuuseqartariaqarpoq alloriaateqarlunilu. Tassunga atatillugu eqqarsaatigisariaqagaat aamma tassaavoq, taamatut politikkeqarnermikkut ajoqusiinerit taarsiissuteqarfiginissaat, Hjalmar Dahl ataatsimeersuarnerup ullumi aallartinngilaattaani taama oqarpoq.