ICC: Issittoq aatsitassarsioqatigiiffiunngilaq
Aqqaluk Lynge naggueqatigiit Inuit issittumi ilisimatusarnermut akuunerat pillugu oqalugiarmat 3.000-nik tusarnaartoqarpoq. Aqqaluk Lynge oqalugiarmat Issittoq aatsitassarsiorfiuinnarani ilisimatuunullu misissuisarfiinnaanani naggueqatigiit Inuit najugaqarfigigaat tamaanilu siunissami najugaqartuaannartussaasut paatsuugasaanngitsumik naqissuserneqarpoq.
Issittup ukiuanut atatillugu ilisimatusarnerit tamaani ingerlanneqartut naggueqatigiinnut inunnut pingaartuteqartuusut oqaatigai, ilisimatusartullu nunat tamalaaneersut suliaqarnerini ICC-p akuulluarsimanera oqaatigaa, allaammi issittumi ilisimatusarnerni annertuuni naggueqatigiit inuit aatsaat taama toqqaannartigisumik tunniussaqarsinnaasimaneri Aqqaluk Lyngep unnersiutigai.
Aamma nunat killermiut issittumi ilisimatusartui naggueqatigiinnit inunnit suli annertunerusumik suleqatigineqalernissaat Aqqaluk Lyngep qilanaarinerarpaa, naggueqatigiillu inuit issittup ineriartortinneqarnerani akerliunatik akuulluinnarusunneri oqaatigalugit.
Ilaatigut timikkut tarnikkullu peqqissutsimut, nerisassallu pitsaasuunissaanut iluaqutaasinnaasunik ilisimatusarnerit Aqqaluk Lyngep oqalugiarnermini pingaaruteqarnerarpai.
Aamma issittormiut ilisimasatoqaasa pingaarutaat oqalugiarnermini uteqattaarpai, taakkulu naggueqatigiit inuit ataatsimoorussarigaat oqaatigalugu. Naggueqatigiimmi Inuit ilisimasatoqqaat siunissami iluaqutaasinnaammata suli atorluarneqarnerusinnaaneri Aqqaluk Lyngep taputartuummagit Montrealimi ataatsimeersuartarfimmi tusarnaartut ajunngivissumik tiguaat.
