ICC Bruxellesimi tapersersorneqarluartoq
EU-p nassuerutigisariaqarpaa piniartortatsinnut saassussiuartutut nipilimmik politikkeqarnini pineqartunut annertuumik ajoqusiimmat. Europami pisisartut piniartut tunisassiaat eqqarsaatigalugit tatiginninnerat aaqqinneqassappat EU-p politikkini allanngortittariaqarpaa piniartullu annaasaqaataannik taarsiissuteqarluni, Hjalmar Dahl, Bruxellesimi ataatsimeersuartoqarnerani taama oqarpoq.
Finlandimi aningaasaqarnermut naalakkersuisuusimasup Paavo Lipponenip Hjalmar Dahl taperserpaa, oqarluni EU-p puisit amiinut tunngatillugu tulluutinngitsumik politikkeqartoq. Aammattaaq Greenpeacemit naggueqatigiit Inuit puisinniartarnerat tapersorneqartoq oqaatigineqarpoq.
AAMMA ATUARUK ICC vil forsøge at påvirke EU's politik på sælskindsområdet
Hjalmar Dahlip aamma siunnersuutigaa EU-p issittoq pillugu politikkimik ilusilersuinermini issittumi nunat inuii peqataatittariaqarai, assersuutigalugu nunap inuiinut qaffasinnerusumik isummersorfiliornikkut, tamatumanilu Naalagaaffiit Peqatigiit Nunap Inoqqaavinut ataatsimiititaliaata ataavartup ilusilerneqarsimanera innersuussutigalugu.
ICC-mit oqariartuutigineqartut naalaarluarneqarput, ataatsimeersuarnerullu inaarutaasumik eqikkaaffigineqarnerani aamma ilanngunneqarlutik.