Inatsisissatut siunnersuut IA-p isornartoqartikkaluarlugu tapersersorpaa
- Siunnersuuteqarnermi naatsorsuutigineqarpoq, inatsimmik nutaamik qallunaat inatsisaannit ajornerusoq qujarutiinnassagipput. Tamanna naleqqutinngilluinnarpoq. Kalaallit Nunaanni ilaqutariit pillugit inatsit ataatsimoortoq Folketingimi aappassaanerlugu ullumi oqaluuserineqarmat, Aaja Chemnitz Larsen Inuit Ataqatigiinneersoq taama oqarpoq.
Inatsisissatut ataatsimoortutut siunnersuummi pineqartunut ilaavoq, ilaqutariit meerartallit angajoqqaatut oqartussaanerup aaqqiagiinngissutaanerani siunnersortinik neqeroorfigineqarsinnaanerat kisianni pinngitsoorani neqeroorfigineqarsinnaanerat pineqarani.
Neqeroorut taamatut ittoq inatsisitigut pisussaaffittut Danmarkimi atuuppoq, taannalu Inatsisartuni amerlanerussuteqartut Kalaallit Nunaanni atuutilersinneqarnissaa kissaatigaat.
Aamma atuaruk Angajoqqaat pillugit inatsisitaassaq IA-mit isornartorsiorneqartoq
Kisianneqartorli danskit isumaginninnermut ministeriat Karen Ellemann oqarpoq:
- Ilumoorpoq Danmarkimi pissutsit allaanerummata.
- Pisarialimmik pissutsinik assigiinngitsoqarpoq, Kalaallit Nunaanni piginnaasaqartunik pisariaqartinneqartunik pinngitsoorani neqoroorutinik taama ittunik suliaqarsinnaasunik maannakkut peqanngimmat, Karen Ellemann oqarpoq.
IA-p oqarnera naapertorlugu, siunnersortinik meeqqat atugaannik immikkut ilisimasalinnit siunnersorteqarnissamik neqerooruteqarsinnaatitaaneq eqqartuussivinni atorneqarsinnaavoq, eqqartuussiviit danskit naalagaaffiata oqartussaaffigisaanni. Tamanna pillugu ministeri isummerusunngilaq.
Karen Ellemannip IA isornartorsiorpaa inatsisissatut siunnersuut ataatsimoortoq IA-p tapersersornerlugu tapersersunnginnerluguluunniit oqaatigiumanngimmagu.
- Taamaattumik paaserunnarpoq siunnersuutip aappassaaneerneqarnerani qanoq taasiniarnerlutik oqaatiginngimmassuk, inatsisissatut siunnersuut ataatsimoortoq tamakkiisumik tapersersorniarnerlugu tapersersorniannginnerluguluunniit, danskit isumaginninnermut ministeriat Karen Ellemand taama oqarpoq.
Aaja Chemnitz Larsenip KNR-imut nalunaarutigaa, inatsisissatut siunnersuut ataatsimoortoq Folketingimi pingajussaanerlugu sapaatip akunnerata tulliani oqaluuserineqalerpat tapersersorniarlugu eqqarsarami, isornartorsiuteqarninili attatiinnarlugu.
Aleqa Hammondip, Siumut, siunnersuut tapersersorpaa, sinnersuulli Folketingimi ullumi oqaluuserineqarmat najuutinngilaq.