Assi: Paalu Møller/KNR

Angajoqqaat pillugit inatsisitaassaq IA-mit isornartorsiorneqartoq

Danmarkimi angajoqqaatut akisussaaneq pillugu inatsit annikillisarlugu Nunatsinnut atuuttussanngortinneqassaaq, angajoqqaat saqitsaassuteqarneranni meeqqanik siunnersuinissaq inatsisitigut pisussaaffinngortinneqassanngimmat, IA taama isumaqarpoq.

Inatsisit ataatsimoortut arlariit, ilaatigut angajoqqaatut akisussaaneq pillugu inatsisip nutarteriffigineqarnissaa, Folketingimi sisamanngorpat aappassaaneerneqassapput.

Inatsisissatulli siunnersuummi oqaaseq ataaseq Folketingimut ilaasortap Aaja Chemnitz Larsenip Inuit Ataqatigiinneersup isornartorsiorpaa. Tassanimi allassimavoq angajoqqaat qitornartik pillugu saqitsaassuteqartillugit Naalagaaffiup Sinniisoqarfia aammalu Nunatsinni eqqartuussisoqarfiit meeqqat pillugit ilisimasalimmit siunnersorteqartitsisinnaasut, allaqqanani siunnersorteqartitsinissamik pisussaaffeqartut.

Danmarkimi pisortat inatsit taannarpiaq naapertorlugu pisussaaffigaat meeqqat pillugit ilisimasalimmit siunnersuisoqartitsinissamik neqerooruteqassallutik.

- Isumaqarpunga Nunatsinni Danmarkimilu assigiissaariniarnissamik politikkikkut anguniagaqartoqartillugu (Danmarkimi, aaqq.) tamanna ajornartorsiutitaqartoq, Aaja Chemnitz Larsen KNR-imut taama oqarpoq.

Akisussaaffiit saqitsaassutaasut

Isumaginninnermut suliassaqarfiup Nunatsinni kommuninit akisussaaffigineqarnera ilaqutariinnullu inatsisitigut suliassaqarfiup danskit naalagaaffiannit akisussaaffigineqarnera pissutigalugu taama inissisimasoqalerpoq.

Nunatsinni siunnersortit meeqqat pillugit ilisimasallit, soorlu isumaginninnermi siunnersortit aamma tarnip pissusianik ilisimasallit amigaataanerat pissutigalugu, Danmarkimi Isumaginninnermut Nunamilu namminermi pissutsinut ministereqarfik naliliivoq Kalaallit Nunaanni meeqqat pillugit ilisimasalimmit ikiorneqarnissamik neqerooruteqartussaanermik piumasaqaateqarnissaq naammassineqarsinnaanngitsoq. 'Kalaallit Nunaanni pissutsit immikkut ittut' sianigisariaqarnerattut tamanna isigineqarpoq.

Nunalli ataatsimoorlutik suliassamik misissuinerisigut aaqqiissuteqarfigineqarsinnaagaluartoq, Aaja Chemnitz Larsen isumaqarpoq.

- Isumaqarpunga ilaqutariinnut inatsisitigut suliassaqarfiup qanoq iliornikkut pitsanngorsarneqarsinnaanera Danmarkimit aamma misissorneqartariaqartoq. Suliniutinimmi nutaanik aallartitsisoqassappat tamanna nukinnik nutaanik pisariaqartitsiffiussaaq.

Danskit iliuuseqarnissaat ilimananngitsoq

Nunat suliassaqarfinnut assigiinngitsunut akisussaaffeqarnerat suliamik naammassiuminaallisitsisoq Danmarkimi Isumaginninnermut Nunamilu namminermi pissutsinut ministereqarfiup nassuerutigaa.

Aamma Danmarkip pisussaaffigaa assersuutigalugu Nunatsinni eqqartuussisoqarfinni sulisut ilinniarteqqinnissaat, taakku meeqqat pillugit ilisimasalittut siunnersortitut atorneqarsinnaasunngorlugit. Suliassaqarfimmili tassani ilinniartitseqqinnissamik maannakkorpiaq pilersaaruteqartoqanngitsoq ministereqarfik KNR-imut ilisimatitsivoq.

Inatsisip oqaasertaani meeqqat pillugit ilisimasalimmit 'sapinngisamik' neqerooruteqartoqartarnissaa Inatsisartunit aamma kaammattuutigineqarsimavoq. Tamannali pisinnaanngitsoq ministereqarfik isumaqarpoq.

- Taamaattoqarneratigullu danskit inatsisiliornerat ajornerusoq Nunatsinni atuuttussanngortinneqassaaq, tamannalu tunngaviatigut kukkunertut isigaara, Aaja Chemnitz Larsen oqarpoq.

Folketingimi Venstremit Siumumiillu oqaaseqartitsisinnaasimanngilagut. Folketingilli Kalaallit Nunaannut tunngasunut ataatsimiititaliaani tusarniaaneq naapertorlugu partiit taakku marluullutik inatsisissatut siunnersuut tapersersorpaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat