IA: Pituffik nunat tamalaat alapernaarsuiffigilissuk
IA siunnersuuteqarpoq isumannaallisaaneq nukittorsartariaqartoq, Thule Air Basep nunat assigiinngitsut akornanni nakkutilliivinngortinneqarneratigut.
Issittoq tassaassaaq "pissanganartorsiuffiunngitsoq" - nuna inuit eqqissillutik inuuffigisinnaasaat sakkutooqarnikkut akuleruffigineqaranilu akerleriissuteqarfiunngitsoq.
Folketingimi partiit tamarmik tamanna isumaqatigiissutigaat, qanorli ililluni?
Oqaluttarfimmiit Inuit Ataqatigiit ilaasortaatitaat Johan Lund Olsen ima siunnersuuteqarpoq:
- Qaammataasatigut paasissutissanik katersuiviit nunarsuarmi annerpaat ilaat Thule Air Basemi pigineqarput, maluginiarneqartariaqarporli tamakku taamaallaat amerikamiut sakkutuuinut naatsorsuussaammata. Nunat allat eqqissinissamik kissaateqartut Thule Air Basep paasissutissanik katersaanut tamakkununnga pissarsisinnaanngillat. Isumaqarpunga tamanna kukkunerusoq, taamaattumillu piumasarisariaqarparput, Thule Air Base piffissap ingerlanerani nunat assigiinngitsut akornanni - tassa amerikamiunuinnaanngitsoq - kalerrisaarivittut- aamma qaammataasatigut ujarlerfittut atuuttariaqartoq.
Paasissutissat Thule Air Basemeersut Naalagaaffiit Peqatigiinnut ingerlateqqinneqartariaqarput, Issittumi eqqissineqaannarnissaa anguniarlugu, Inuit Ataqatigiit isumaqarput.
