IA: Piniarneq takornariaqarnerlu ataqatigiinngitsut
Naalakkersuisut malittarisassanik allannguinavianngillat. Tassami Vittus Qujaukitup oqaatigereerpaa takornariaqarneq piinnarlugu arfanniartarneq allannguiffiginiarnagu.
Arfanniarneq takornariaqartitsiniarnerlu imminnut aporaapput. Takornariaqartitsisummi arfernik takornariartitsisarneq unitsiinnartariaqarsimavaat, arferit takuniarneqartarfimminiikkunnaarsimammata.
Aamma atuaruk Qujaukitsoq: Takornariat arfernik takorusukkunik Maniitsuliarlik
Taamaammallu allannguisoqartariaqartoq kommunalbestyrelsimi ilaasortaq isumaqarpoq.
- Isumaga malillugu, takornariaqarneq ineriartortissagutsigu Nuup eqqaani arfanniartoqarsinnaanngilaq. Takornariaqarneq arfanniarnerlu ingiaqatigiissinnaanngillat, Malene Lynge KNR-imut oqarpoq.
Taanna isumaqarpoq arfanniarneq imaluunniit takornariaqarneq pingaartinneruneqassanersoq aalajangiisoqartariaqartoq.
Arfernik angisuunik illersuineq piniarnerlu pillugit Namminersorlutik Oqartussat nalunaarutaanni kapitali 9-mi paragraf 32-i naapertorlugu kommunalbetyrelsi malittarisassanik aaliangersaasinnaavoq.
§ 32-imi ima allaqqavoq:
Arfanniarnerup arfernillu takornariaqarnerup ingerlanneqartarnerannut sukumiisumik malerruagassartalinnik kommuni ileqqoreqqusaliorsinnaavoq .
- Inatsit taanna oqqutigalugu arfanniartarnermut arfernillu takornariartitsisarneq pillugit malittarisassiornissamut periarfissaqarpugut, Malene Lynge oqarpoq.