IA-p Naleqqallu aningaasanut inatsisissatut siunnersuut pillugu: Pitsaanerusinnaavoq
- Naammaginngilaq! Tunniutiinnareerluni inissiinnartoqarsinnaanngilaq. Aaqqiissutissanik inuiaqatigiit sinnerlugit ujarlertariaqarpugut, Inuit Ataqatigiinnit Muté Borup Egede oqarpoq.
Taassuma Naalakkersuisut aningaasanut inatsisissatut siunnersuut ippassaq saqqummiussaat ilorrisimaarutiginngilaa.
Partii Naleraq aamma ilorrisimaarinninngilaq.
- Partii Naleqqamiit ersarissumik oqariartuutigissavarput ajuusaarutigigipput aasimmiaat qitiusumut aningaasaliilluni sineriak puigorlugu ingerlatsiniarsarisoqarmat, Partii Naleqqamit Pele Broberg oqarpoq.
Aningaasanut inatsisissatut siunnersuummi, aningaasaqarnermut naalakkersuisup, Vittus Qujaukitsup (NQ) ataasinngornermi saqqummiussaani 2021-mi 183,3 millionit koruuninik amigartooruteqartussatut allassimavoq.
AAMMA ATUARUK Vittus Qujaukitsoq: Aappaagu amigartooruteqarnissaq pinngitsoortinneqarsinnaanngilaq
- Nalunngilarput piffissaq immikkuullarissuusoq, immikkut ittumik atugassaqartitaavugut, tamannalu aamma aningaasaqarnikkut aamma qalipaasersueqataassaaq, Vittus Qujaukitsoq tusagassiortunik ataasinngornermi katersortitsinermi oqarpoq.
Aappaagumut missingersuutit ataqatigiissinniarneri ajornaatsuinnaanngilaq, nunattami piffissami aggersumi isertitassaanut qularnartorpassuupput.
Nunattami aningaasanik isaatitsinera pingaarnerpaaq tassa aalisarneq akit appariartornerannik eqqugaaqqavoq.
Coronap ilungersunartorsiortitsinerani aningaasartuutit nunatta karsianut kalluaanerupput. Naalakkersuisut coronap ilungersunartorsiortitsinerani ukiup naanissaanut 595 millionit koruuninik aningaasartuuteqarnissartik naatsorsuutigaat.
Inatsisartut aningaasaqarnermut akileraartarnermullu ataatsimiititaliaata Naalakkersuisuit anignaasanut inatsisissatut siunnersuutaannik aappaagumullu 183,3 millionit koruuninik amigartooruteqarnissamut aamma ilorrisimaarinninngilaq.
Ataatsimiititaliap Naalakkersuisut pisariaqartunik sipaarniarnissamut siunnersuusiornissaat kissaatigaat, taamaalilluni 2021-mut aningaasanut inatsimmi oqimaaqatigiittoqanngikkuni sinneqartooruteqartoqarsinnaavoq.
Amigartooruteqarneq kinguaariit tulliinit akilerneqassanngitsoq
Illuatungiliuttut partiivisa Inuit Ataqatigiit Partii Naleqqallu assatit ersaattaatingilaat.
- Amigartoorneq kinguaassatta akiligassaattut inissinneqaannartutut nunattalu avataannit attartornissamik isumalluuteqarnermik tunngaveqarpallaaqaaq, Muté Borup Egede (IA) oqarpoq.
Taamaammat illuatungiliuttut partiivi amigartooruteqarnissamut matussusiinissamut sipaarniarnissamut siunnersuuteqarput: nunami allamiunut siunnersortinut aningaasartuutikinnerusoqartariaqartoq, IA isumaqarpoq.
- Nunatta avataanit atukkagut 50 millioninik ilanngartariaqarpagut. Tassani aningaasat aasassat siulliit ipput, Muté Borup Egede oqarpoq.
AAMMA ATUARUK Ataatsimiititaliaq 2021-mut aningaasanut inatsisissatut siunnersuut pillugu: akuersaarneqarsinnaanngilaq
Pele Brobergip aningaasanik aallerfissanik allanik ulikkaarsoraa.
- Ajornanngitsuaqqamik sipaarsinnaagaluarpugut. Ilanngaassivik, Sulinermut Ilanngaat, suliffeqarfissuit akileraarutaannit appaaniarneq, kukkusutut inissinnikut, taakku sipaarfigineqarsinnaagaluarput siullertut, Partii Naleqqamit, Pele Broberg oqarpoq.
Pele Brobergip (PN) sipaarniarnissamut siunnersuutaa
Ilanngaassivik
Ilanngaassivik Naalakkersuisut innuttaasut pisortanut akiligassaannik akiitsuinillu akiliisitsiniarfigaat.
Pisortanut akiitsut siorna kisitsisinngorlugit saqqummiunneqarput: Akiitsoqartut katillugit 1 milliardit koruuniungajapput, tamannalu agguaqatigiissillugu innuttaasut tamarmik immikkut pisortanut 18.000-it missaannik akiitsoqarnerannik isumaqarpoq.
Akiliisitsiniarnermi akiitsut akilerneqarsimanngitsut innuttaasut akissarsiaatigut akilerneqartassapput, tamanna nunatta karsiata kontoanut plusseqartitsissalluni.
Ilanngaassiviup 2021-mi atuutilernissaa naatsorsuutigineqarpoq, taannalu pisortanut ukiumut 30 millionit koruuninik isertitsissutaanissaa nalilerneqarpoq. Ilanngaassiviulli atulersinneqarnera aamma 30 millionit koruuneqassaaq, tamatumalu kingorna ingerlanneqarnissaa 7,5 aamma 9,5 millionit koruunit missaannik aningaasartuutaasassalluni.
Suliffeqarnermi ilanngaat
Suliffeqarnermi ilanngaat Naalakkersuisut innuttaasunut sulisitsiniarsarineraat. Ilanngaat qanoq isertitaqartigineq apeqqutaalluni annertussusilerneqartassaaq.
Ilanngaat isertitaqarnerillu qaffattassaaq ukiumulli 198.000 koruunit 386.000 koruunillu akornanni isertitaqaruit aningaasat atorsinnaasatit ukiumut 4.214 koruunit sinnerlugit amerlissapput.
Suliffeqarnermut ilanngaat nutaat nunatta karsianutj 50 millionit koruuninik akeqassangatinneqarpoq.
Ingerlatseqatigiiffiit akileraartarnerat
Ingerlatseqatigiiffiit akileraartarnerat siorna 30 procentimiit 25 procentimut appartinneqarpoq, Naalakkersuisullu oqarnerat naapertorlugu taanna nunatsinni suliffeqarfinnut anginerusunut pitsaanerusumik atugassaqartitsissaaq.
Taassuma oqarnera naapertorlugu tamanna akitsuutinik appaanissamut inissaqartitsissaaq.
- Taassumallu malitsigisaanik akileraarutit, akitsuutit aamma qiviarneqarsinnaallutik, inunnut tunngasut toqqaannaq apparnissaat. Taakku uagut pilersaarusiorfigereeraluarpagut soorunami.
Aaqqiissuteqarnissaq neriuutigigaa
Naalakkersuisut 2021-mut aningaasanut inatsisissatut siunnersuutaat inatsisissatut siunnersuutit allat assigalugit Inatsisartuni pingasoriarlugu oqallisigineqaqqaassaaq. Inatsisartut tulliani ukiakkut ataatsimiinnermi novembarip 25-at, 2020-mi aallartittumi ataatsimiissapput.
Inuit Ataqatigiit aningaasanut inatsit Inatsisartuni oqallisigineqartussanngorpat aaqqiissutissamik nassaartoqarsinnaanissaa neriuutigaat.
AAMMA ATUARUK Aningaasanut inatsimmut siunnersuutip nutaap politikkikkut ukiami sulineq aallartissagaa
- Pissutsit massakkut nalaatagut pisariaqartitsipput ataatsimoornermik aammalu siunissamut ungasissumut isigisumik aaqqiinissanik ujartueqatigiinnissatsinnut, Muté Borup Egede oqarpoq.
Pele Brobergili neriulluarpallaannginneruvoq.
- Neriulluarpallaanngilanga aningaasaqarnermut naalakkersuisup takutereermagu oqimaaqatigiissumilluunniit aningaasalersukkamik inatsisiliorsinnaanatik. Taamaammat inissaqartinnagit Inatsisartut partiillu kissaataat.
