Ataatsimiititaliaq 2021-mut aningaasanut inatsisissatut siunnersuut pillugu: akuersaarneqarsinnaanngilaq
Aappaagu aningaasanut inatsisissaq 183,3 millionit koruuninik amigartooruteqarfiusoq akuersaarneqarsinnaanngilaq.
Inatsisartut aningaasaqarnermut akileraartarnermullu ataatsimiititaliaa aningaasaqarnermut naalakkersuisup naalakkersuisut 2021-mut aningaasanut inatsisissatut siunnersuutaannik saqqummersitsinerani ullormi tassani taama isumaqarpoq.
Ataatsimiititaliap aningaasanut inatsisissatut siunnersuut Uummannami ulluni sisamani isumasioqatigiinnerminni misissorpaat.
- Naak misissuinini sukumiilluinnartumik ingerlakkaluarlugu Naalakkersuisut inatsisissatut siunnersuutaata maannatut isikkoqartilluni ataatsimiititaliamit maannangaaq akuersaarneqarsinnaanngitsumik annertussuseqartumik amigartoorfiusussaanerata qitiutinnissaa ataatsimiititaliamit toqqarneqarallarpoq, siulittaasoq, Hermann Berthelsen (Siumut) oqarpoq.
2021-mit 2024-mut sinneqartooruteqarnissamut amigartooruteqarnissamullu naatsorsuutit:
Naalakkersuisut 2021-mut aningaasanut inatsisissatut siunnersuutaat: 183,3 millioninik amigartooruteqarneq
Naalakkersuisut 2022-mut missingersuutigaat: 17,5 millioninik amigartooruteqarnissaq
Naalakkersuisuts 2023-mut missingersuutigaat: 29 millioninik sinneqartooruteqarnissaq
Naalakkersuisut 2024-mut missingersuutigaat: 3,1 millioninik amigartooruteqarnissaq
Aningaasanut inatsip ataqatigiinnissaanut ”ukiuni sisamani oqimaaqatigiittoqarnissaa sinneqartooruteqarnissaaluunniit” pisariaqartoq, aningaasanut ataatsimiititaliaq isumaqarpoq.
Naalakkersuisut 2024-mi 3,1 millionit koruuninik sinneqartooruteqarnissaq naatsorsuutigaat.
Sipaarniarfissatut pisariaqartunik saqqummiussisoqarli
Inatsisartulli aningaasanut akileraartarnermullu ataatsimiititaliaata 2021-mut 183,3 millionit koruuninik amigartooruteqartoqarnissaa ernumassutigaat.
- Pissutsit maannatut itsillugit ukiup tullianut ukiunullu missingersuusiorfiusunut aningaasanut inatsisissatut siunnersuut tamakkiisumik aningaasalersugaappat akisussaassuseqarnerpaassaaq, Hermann Berthelsen oqarpoq.
Ataatsimiititaliap Naalakkersuisut taamaammat sipaarniarnissamut pisariaqartunik siunnersuusiornissaat kissaatigaa, taamaalilluni 2021-mut aningaasanut inatsimmi oqimaaqatigiittoqanngikkuni sinneqartooruteqartoqarsinnaavoq.