IA: Oqallinnissamut piffissaqarluarpoq
Illua tungiliuttut siuttuata, Aleqa Hammondip, Naalakkersuisoqatigiit ukiuni marlunni atuutereersut, ammanerusumik ingerlatsinissamik neriorsuutertik eqquutsinngikkaat unnerpaa.
Ataatsimiititaliarsuit marluk nalunaarusiaat saqqumminneqaqqaaramik tamakkiisumik nutserneqanngitsut Inatsisartullu avaqqutiinnarlugit Air Icelandimut isumaqatigiissuteqarneq Aleqa Hammondip assersuutigai.
- Inuit Ataqatigiinni uggorivarput kalaallisut nutsernera piffissarujussuarmik atuiffiusariaqarsimammat, Inuit Ataqatigiit politikikkut oqaaseqartartuat, Aqqaluaq B. Egede oqarpoq.
Akileraartarneq atugarissaarnerlu pillugit isumaliutissiissut aamma assartuussineq pillugu isumaliutisiissut, kalaallisut tamakkiisumik nutserneqaratik kingusinnerusukkut saqqummerput. Taama pineq Siumup siulittaasuata ullup qeqqanut Radioavisimi isornartorsiorpaa:
- Isumaqarpunga tamanna ammanermik takutitsinngitsoq, killormulli inuiaqatigiinnik peqataatitsinnginnerusoq aamma oqartussaanerpaat, tassa qinersisartut, atuarsinnaanissaannik periarfissiinngillat, Aleqa Hammond oqarpoq.
Kalaallisuinnarli atuartartut naammattumik ilisimasaqalerlutik oqallinnermut akuliunnissamut kinguussaanngitsut, Aqqaluaq B. Egede neriorsuivoq.
- Tamakkiisumik oqallinneq aatsaat naammassippat aalajangersaaneq pisussaammat inortuisoqanngilaq, inuit tamarmik isummersinnaanerminnik periarfissinneqaqqaarlugit aatsaat aalajangersaasoqassaaq, Aqqaluaq B. Egede oqarpoq.
Aamma Namminersorlutik Oqartussat sulisuisa sulinermut atatillugu angalasarnerannut atasumik Air Icelandimit sullinneqarnissamik isumaqatigiissutaat taamani aningaasaqarnermut naalakkersuisuusup, tassanili atuuffeqarunnaartup Palle Christiansenip, pisiniartarnermi isumaqatigiissutitut naliginnaasutut taagugaa, Radioaviisimit saqqummiunneqarmat, Inuit Ataqatigiit Inatsisartuni ilaasortaasa isumaqatiginagu nalunaarutigaat.
Aqqaluaq B. Egede, ima oqarpoq:
- Inuiaqatigiinnut saqqummiupparput isumaqatiginagu, taassuma kingorna Naalakkersuisut peqatigalugit periarfissarsiorluta naapippugut, naak Naalakkersuisut inatsisartullu ilaatigut isumaqatigiinngissuteqaraluarlutik oqaluuserineqartoq ataatsimoorfissarsiorlugu naammassillugu suliarivarput, Aqqaluaq B. Egede oqarpoq.
Air Icelandimut isumaqatigiissutip ilaatigut inuiaqatigiinnut kingunissai aningaasaqarnermut naalakkersuisunngortup, Maliina Abelsenip, nalilersoreerlugu aalajangerpoq, atuisut ikittuinnaammata atuutiinnassasoq.
