IA aamma Partii Naleraq: aaqqissuusseqqinnissat pisariaqartitsinerpaanut tussapput
![](/sites/default/files/styles/image_934x467/public/article_images/aqqaluaq_b_egede630.jpg?itok=9InjuviU)
Naalakkersuisut siusinaartumik sulisinnaajunnaarnersiutilinnut tunngasunut aaqqissuusseqqinnissaannut pilersaarutaat, siusinaartumik sulisinnaajunnaarnersiutillit amerlanerit sulilersinnissaannik kinguneqartussat aammalu utoqqalinersiutilinnut tunngasunut aaqqissuusseqqinnissaq utoqqalinersiaqalertarnermut killiliussap qaffannissaanut tunngasut pillugit illuatungiliuttunit Partii Naleqqakkunnit Inuit Ataqatigiinniillu apeqquserneqarput.
Taakkumi isumaqarput, Naalakkersuisut pilersaarutaat ingerlatsivinnut akileraarutip suliffeqarfinnut iluaqutaasussamut appartinneqarnissaa aaqqissuusseqqinnissanut tulluutinngitsoq:
- Suliassanut tulleriaarinermut pingaarnersiuinermullu tunngatillugu isumaqarpugut, uagut politikkitsinnut naapertuuppallaanngitsut. Pissutigalugu inuit pisariaqartitsisut aammalu inuit pissakinnerusut tassani annerusumik eqqarsaatigineqanngimmata, Anthon Frederiksen Partii Naleraq sinnerlugu Inatsisartuni ilaasortaq taama oqarpoq.
Taannalu Inuit Ataqatigiinneersumit Aqqaluaq B. Egedemit isumaqatigineqarpoq.
- Oqarluaannaraanni inuiaqatigiinni pisariaqartitsinerpaartagut sipaarniarfigineqarput pisariaqartitsinnginnerusut oqilisaanniarlugit. Taamaammat tassani aningaasarsiornernikkut ajalusuulernermi naalakkersuisut inuit atugaanik atugarliortitsinerunissamik siunertaqarneranik inuit ataqatigiinninngaanniit isumaqatiginngilarput, Aqqaluaq B.Egede oqarpoq.
Suleqatiginnikkumassuseq
Inuit Ataqatigiinniillu qisuariarneq Aningaasaqarnermut aatsitassanullu naalakkersuisumit Andreas Uldumimit tupaallaatigineqarpoq.
- Isumaqataanngilluinnarpunga taamatut oqariartuuteqarnermut, kisianni tupaallaatigeqaara assut akileraartarnermut atugarissaarnermullu isumalioqatigiissitap innersuussutai, malikkusunnikooqisatik, massakkut tunullugit ingerlanialermata. Tassami una siusinaarluni suliunnaarnersiuteqarnermut tunngasoq taakku suliaannut naapertuuttupilussuugami, taamaammat tupaallannarpoq politikkikkut allaqqinnaamut sangusimanerat, Andreas Uldum taama oqarpoq.
Taanna aamma isumaqarpoq oqallinneq ajunngitsumik ingerlanneqartoq naak Partiit akornanni isumaqatigiinngittoqaraluartoq:
- Tassa suleqatigiikkusussuseq taanna annertooq pigineqartoq uanngaanniik pingaarnertut nassarusuppara, tassami siammasissumik aalajangiisinnaagutta assigiinngitsutigut immikkoortortani assigiinngitsuni suliarisatsinni angusassarput pitsaasorujussuussagami, Andreas Uldum taama oqarpoq.
Ukiunut tulliuttunut pilersaarut
Naalakkersuisup oqarnera Atassutikkunnit tapersersorneqarpoq.
- Isumaqarpunga oqallinnerput ajunngitsumik ingerlasimasoq, pissutigalugu partiit tamatta suleqatigiinnissamik takutitsilluta pigatta. Taannartaa assut nuannerpoq, naak ilaanni oqallittarnerput ilaannikkut pikkunarsinnaasaraluartoq akornatsinni immitsinnut sammileraangatta, kisianni anguniagarput tamarmi inuiaqatigiinni pitsaasumik angusaqarnissaq aallaavigigatsigu takusinnaavara, Steen Lynge oqallittoqarnerani partiiniit kingulliulluni oqaluttarfimmiit oqaaseqartoq Atassut sinnerlugu inatsisartunut ilaasortaq taama oqarpoq.
Aningaasaqarnikkut ingerlatsineq pillugu nalunaarutip ippassaq marlunngornermi saqqummiunneqarnera pillugu oqallinneq Siumumiit aamma naammagisimaarneqarpoq.
- Ataatsimut naliliinerput siumuminngaanniit malillugu, pitsaasutut nalilerparput. Aamma ukiut aggersut eqqarsaatigalugit isumaliutinik imaqarmat, Siumut sinnerlugu Inatsisartuni ilaasortaq, aningaasaqarnermullu ataatsimiitsitaliami siulittaasuusoq, Jens Immanuelsen kingulliulluni taama oqarpoq.