IA Nalerarlu: USA-p tapiiniarneranik qulaatiinnarluta aalajangerput
USA-p nunatsinnut aningaasaliinissamik pilersaaarummi sumik imaqarneranik sisamanngornermi kingusinnerusukkut saqqummiussisasoq naatsorsuutigineqarpoq.
Aningaasat eqqartorneqartut 12 millionit dollarsiusut, tassa 82 millionit koruuniusut, KNR-imi tusarfinnit arlalinni ippassaq tusarparput.
Millionerpassuit nunatsinnut tunniunneqartussat pillugit nunanut allanut isumanaallisaanermullu ataatsimiititaliaq ullumi ataatsinut qiteqquppat ataatsimiissaput.
Kisianni Partii Naleraq Inuit Ataqatigiillu uani ilaatinneqatutut tusarneqartutulluunnit misigisimanngillat.
- Pingaarnerpaatut apeqqutaassaaq sooq inatsisartut peqataatillugit ingerlanneqarsimanngitsoq. Qanorililluniuna inissineqarsimasoq una paasisariaqarparput, Pele Broberg oqarpoq.
Tassami innuttaasut politikerillu qisuariarnissaannut kingusinaareeraangata innuttaasut politikerillu oqarsinnaajunnaarlugi, taamaattusaasutut saqqummiuttaraat, Pele Broberg isumaqarpoq.
AAMMA ATUARUK Tusarfiit KNR-imut: USA nunatsinnut 82 millionit koruuninik tapiissuteqarniartoq
Taannali kisimi taamatut misigisimanngilaq, Inuit Ataqatigiinneersormi Múte B. Egede aamma taamatut misigisimavoq.
- Isumaqarpunga inatsisartut tamakkiisumik peqataatinneqanngitsut, illuatungiliuttuugunik naalakkersuisuutitaqarunilluunniik, taanna oqarpoq. nangillunilu:
- Taamatut ingerlaneq naammalerpoq, naalakkersuisut matoqqasumik ingerlatsinerat naammalerpoq. Tamakku apeqqutit annertuut ataatsimoorussassanukua, Múte B. Egede oqarpoq.
Anigaasat takornariaqarnermut, aatsitassarsiornermut tuluttullu ilinniartitsinermut atorneqassasut
USA-mit nunatsinnut “aningaasanik ikiorsiissutinik” tapiissuteqarnissamik amerikamiut Danmarkimi aallartitaat, Carla Sands sapaatip akunnera aallartiinnartoq nalunaarpoq.
Aningasaliissutiginiarneqartutut 82 millionit koruunit KNR-ip tusarfiinnit assigiinngitsunit tusarpaa.
Aningaasat ilaatigut nunatsinni takornariaqarnermut, aatsitassarsiornermut tuluttullu atuartitsinermut atorneqassapput.
AAMMA ATUARUK Ilisimasallit: USA nunatta ikinngutinnaavini tulliujumalluni akiliisoq
Pele Brobergilli aningaasat taakkununngarpiaq sooq atorneqassanersut apeqquserpaa:
- Uagut nalugatsigu amerikamiut taamatut illuinnaasiortumik inissiiniarnersut, immaqaluunniit naalakkersuisullu isumaqatigeereersimanersut suna politikkikut anguniarlugu aningaasalersussaneraat.
- Qulakkeertariarparput, nunat allat nunatsinnut aningaasaliiniarpata; sooruna taamaaliorniartut taavalu qanoq akeqassava?
Naalakkersuisut pisortatigoortumik sapaatit akuneranni kingusinnerusukkut nalunaaruteqarumaarlutik ippassaq nalunaarput.
