Nikoline Ziemer IA-mit Siumumut nuuppoq: Kuannersuit piviusunngortariaqarsorigakku nuuppunga
Nikoline Ziemer Inuit Ataqatigiinni ukiuni arfineq pingasuni ilaasortaareerluni, Kuannersuarni suliniutip piviusunngortinneqarnissaa kissaatigalugu IA-mit Siumumut nuunnini tunngavilersuutigaa.
- Kuannersuarni suliniutip piviusunngornissaa uannut pingaaruteqarpoq. Soorunami peqqissutsimut tunngassuteqartut eqquutsinneqarnerat qulaakkkeerneqarsinnaappata, Nikoline Ziemer, ukiut arfineq pingasut Inuit Ataqatigiinnut ilaasortaareerluni Siumut sinnerlugu Inatsisartunut maanna qinigassanngortittoq oqarpoq.
AAMMA ATUARUK Inuiaat marlunngornermi pingasunngornermi akerliussutsimik takutitsisoqassaaq
Inuit Ataqatigiit Nikoline Ziemerip ilaasortaanerani uran pillugu politikkini allanngortinnikuunngilaa, soorpiaammitaavaana isumaanik allannguisuusimasut?
- Kuannersuarni suliniutip piviusunngornissaa qanillinikuuvoq. Malittarisassat malinneqarpata suliniut akuerineqariaannaavoq. Taava partiit allat uranimut attueqqusinnginneq atuutileqqitsinniarpaluppaat, tamannalu nunatta tusaamaneqarneranut innarliissasoq isumaqarpunga, Nikoline Ziemer oqarpoq.
Kuannersuarni suliniut pillugu paasissutissat piviusut:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Minerals aatsitassarsiornissamut akuerineqassanersoq - qaqugu tamanna pissanersoq ilisimaneqanngilaq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut ) 111 millionit tonsiussalluni.
Tusarfik: Pinngortitaleriffik aamma Nationalt Center for Miljø og Energi, IPN-iliaq.
Taassuma Inuit Ataqatigiinnut ilaasortaanermini naammagittartariaqarsimasutut misigivoq.
- Uranimut attueqqusinnginnerup eqqunneqarnera isumaqatiginngikkiga Inuit Ataqatigiinni ilisimaneqarpoq, ikinnerussuteqartullu ilaginikuuvaanga, tamannalu allanngortariaqartoq maanna aalajangerpunga, Nikoline Ziemer oqarpoq.
AAMMA ATUARUK Inuit Ataqatigiit: Siuttunngussagutta Kuannersuarni suliniut unitsissavarput
Nikoline Ziemer sassartaraluarluni inatsisartunut qinigaanikuunngisaarnarpoq.
31-nik ukioqarluni Socialistisk Folkeparti sinnerlugu Folketingimut qinersinermi 2005-imi qinigassanngortippoq.
Nikoline Ziemerip Sorlaat Partiaat 2008-mi pilersippaa, partiimullu siulittaasutut qinigaalluni.
KNR-ip Inuit Ataqatigiit siulittaasuat Múte Bourup Egede attavigaa, taassumalu Inuit Ataqatigiit nunatsinni uranisiortoqannginnissaa qinngornernillu ulorianartunik qalluisoqannginnissaa politikkerigaat paasissutissiissutigaa.
Inuit Ataqatigiilli uranimik attueqqusinnginnermut inatsit atuutileqqissaneraa itigartinngilaa.
