IA-meersut: Innuttaasunik sianiinaarinninniarneq

Siumup paasinninera napertorlugu taama akileraaarusiinikkut Nunatta Karsia 336 millionit koruuninik ukiunilu missingersuusiorfiusuni sisamani tulliuttuni aamma 250 millionit koruuninik allanik isertitaqarnerussaaq.

Siunnersuutilli taassuma naalakkersuisoqatigiit illua'tungiliuttullu imminnut sapaatip akunnerata siuliani ungasinnerulersippai.

Aamma aningasaqarneq pillugu oqaaseqartartoq Juliane Henningsen, IA-p siulittasuata tullia Aqqaluaq B. Egede aamma inatsisartuni gruppip siulittaasua Olga P. Berthelsen allagaqarnerminni saamasaanngeqaat.

- Siunnersuut pitsaanerpaamik taaneqassaguni assersuusiarineqarsinnaavoq piaaraluni innuttaasunik neriulussinnartitsiniaaneq paasisimaqanngilluinnarneq utoqqatsissusissanngikkaanni, IA-meersut allapput.

Taakkua naapertorlugit eqqartuussissuserisoq aatsitassanut pisortaqarfiup sulisitaa misissuinermini ima inerniliisimavoq:

- Aatsitassarsiornissamut misissuinerit akitsuuteqaleraluarpata, aatsitassarsiornissamut akuersissummik pigisaqartut inatsisip atuutilerneratigut annaasaqarneq pissutigalugu Namminersorlutik Oqartussat taarsiisussanngortinniarsinnaavaat, Inatsisileritooq politikerit IA-meersut taaama issuarpaat.

Aammami aatsitassarsiornissamut misissuinerit akitsuuserneqaraluarpata, isertitat tamarmik Nunatta Karsianut tunnavianngillat.
Tamatumanngami isertitaqalissagaluarpat, Namminersorneq pillugu inatsimmi agguaaqatigiinnissamut periusissaq atuutilissaaq, tassalu Nunatta aallaqqaammut 75 millionit koruunit naammagiinnartariaqassagai. Sinneri naalagaaffiup Namminersorlutillu Oqartussat agguassavaat.

- Taamaalilluni illua’tungiliuttut siunnersuutaat sutigulluunniit piviusunngorsinnaajunnaassalluni, Juliane Henningsen, Aqqaluaq B. Egede aamma Olga P. Berthelsen allapput.

2012-imi aningaasanut inatsisissaq naggataarutaasumik aalajangiiffiusumillu ullumi oqaluuserineqassaaq.