IA-meersoq kommunalbestyrelsimit tunuartoq
Tamanna nammineerluni marlunngornermi tusagassiorfinnut nalunaarutigivaa. Taamaalillutik Inuit Ataqatigiit Kommuneqarfik Sermersuumi kommunalbestyrelsimi ilaasortaatitamik nuimanerit ilaat annaavaat.
Mille Søvndahlip kommunalbestyrelsimut ilaasortaajunnaarnera inuttut aalajangerneranit toqqammaveqarpoq tamannalu annertunerusumik nassuiaateqarfigiumanagu, tusagassiorfinnut nalunaaruteqarluni taama allappoq.
Mille Søvndahl ikaarsaariarnermut ataatsimiititaliami 2008-mi qinigaavoq kingornalu januaarimi 2009-mi kommunalbestyrelsimi aamma aningaasaqarnermut ataatsimiititaliami ilaasortaalluni.
Mille Søvndahl Kommuneqarfik Sermersuumi Sanaartornermut Avatangiisinullu ataatsimiititaliami piffissami kingullermi siulittaasuuvoq.
- Kommunerujussuarnik pilersitsinerup kingunerisaanik suliassat annertusimaqaat, ulloq manna tikillugu naammassivinneqarsimanngitsut. Isumaqarpungali angusaqangaatsiarsimasugut, Mille Søvndahl taama oqarpoq.
Politikki qimavinnianngilaa
Taassuma erseqqissaatigaa politikki qimavinnaviarnagu, Inuit Ataqatigiit siulersuisuunerini ulluinnarni aqutsisutut ilaasortaanini ingerlatiinnassagamiuk.
Mille Søvndahl Ado Holmimit taarserneqassaaq, Ado Holm qinigaaffiup siuliani Sanaartornermut Avatangiisinullu ataatsimiititaliami siulittaasuuvoq.
Inuit Ataqatigiit kommunalbestyrelsimi gruppianni siulittaasup Charlotte Ludvigsenip Mille Søvndahlip tunuarnera tusaatissatut tigullugu akuersaarpaa, Søvndahl misilittagaqarluartuummat maqaasineqarumaartoq, Charlotte Ludvigsen oqarpoq.
- Taamaakkaluartorli nuannaarutigaarput grupperput nutaanik misilittagaqarluartunillu ilaasortaaffigineqalersussaammat, tamatumuunalu Kommuneqarfik Sermersuumi politikkikkut ingerlatsinerput nangeqqissinnaassallutigu, Charlotte Ludvigsen, gruppimi siulittaasoq oqarpoq.
