IA-kkormiut uran oqallisigilerpaat

- Inuit Ataqatigiit ataatsimeersuarneranni uran pillugu eqqartuissaagut, aatsitassat uranitallit uranip akuata annerpaaffissaata 0,1 procentiusup atuutiinnarnissaa allannguuteqarnissaaluunniit aalajangiiffigineqassasoq, Kuupik V. Kleist.

Uran pillugu apeqqutip sukumiisorujussuarmik oqallisigineqarnissaa Kuupik V. Kleist-ip takorloorpaa,  - alakkaamalersimasat ilisimalersimallu annertusiartortillugit oqallinneq soqutiginartorujussuussasoq, Kuupik V. Kleist oqarpoq.

Uran pillugu apeqqut ataatsimeersuarnermi qanoq inerniliisoqassanersoq Kuupik V. Kleistip ilisimannginnerarpaa, namminerlu uran pillugu apeqqut ataatsimeersuarnermi aatsaat saqqummiunniarlugu oqarpoq.

Ataatsimeersuarnermi uran kisimi oqaluuserineqartussaanngilaq. Inuit Ataqatigiit ukiuni sisamani naalakkersuisuini siuttuusimanerat nalilersuiffigineqassaaq, qinersinissamilu politikkikkut suliniutissat  saqqummiunneqassallutik.

Inatsisartunut, kommuninut, nunaqarfinni aqutsisunut ilagiillu sinniisuinut qinersinissat ataatsimeersuarnermi oqaluuserineqassapput. Inuit Ataqatigiit qinersivik maanna qaangiutilersoq ataatsimeersuarnermi naliliiffigissavaat.

Inuit Ataqatigiit ataatsimeersuarneranni inatsisartunut qinersisoqarnissamik suaaruteqartoqarnissaa ilimasuutigineqaraluarpoq.

Inatsisartunut qinersinissaq kingusinnerpaamik juunip aappaani ingerlanneqassaaq, tamannalu inatsisitigut aalajangersagaavoq, Kuupik V. Kleist oqarpoq, taassumalu erseqqissaatigaa ulloq sunarpiaq inatsisartunut qinersinissaq suli aalajangiunneqanngitsoq, partiillu siulittaasuata naatsorsuutigaa, Inuit Ataqatigiit ataatsimeersuarnerat naammassineqariarpat inatsisartunut qinersinissaq ullulerneqarumaartoq.

IA Sisimiuni  tallimanngornermit sapaat ilanngullugua ataatsimeersuassaaq.

Ataatsimeersuarneq siulersuisuunernik qinersinermik naggaserneqassaaq aamma siulittaasumik qinersinermik. Inuit Ataqatigiit siulittaasuat Kuupik V. Kleist unammillerteqarani siuliuttaasussatut sassarpoq.

Inuit Ataqatigiit ataatsimeersuarnerani SF-it siulittaasuat Annette Vilhemsen pingaarnertut oqalugiassaaq.