IA-kkormiut siulittaasumik qinersisassapput

Inuit Ataqatigiit qineqqusaanngilaataani ataatsimeersuarniarput. Partiip politikkikkut anguniagassai ataatsimeersuarnerup sapaammi ualikkut naammassineqannginnerani aalajangersarneqassapput.

- Partiip politikkikkut anguniagassai ataatsimeersuarnermi aalajangersarneqartussaapput, taamaammat tamanna pitinnagu oqaaseqarfigisinnaanngilakka, Inuit Ataqatigiit siulittaasuat Kuupik V. Kleist KNR.gl-imut oqarpoq.

Inuit Ataqatigiit aamma qinigaaffik siulleq Naalakkersuisunut siuttuuffiusoq naliliiffigisussaavaat.

- Ataatsimeersuaqataasut Naalakkersuisuni partiitut siuttuusutut sulinerput angusavullu naammaginarnersut isummerfigissavaat. Naalakkersuisooqatigiinni suleqatigiinneq aamma naliliiffigissavarput, Kuupik V. Kleist oqarpoq.

Ataatsimeersuarnermut aamma tikeraartoqassaaq. Tassalu SF-ip siulittaasua Annette Vilhelmsen aamma Enhedslistenip aallartitaa. Aalisartut piniartullu kattuffiat KNAPK, sulisartut kattuffiat SIK aamma Inuit Issittormiut Suliniaqatigiiffiat ICC ataatsimeersuarnermut aamma qaaqqusaasimapput.

IA-p ataatsimeersuarnera Sisimiuni kulturikkut illorsuarmi Taseralimmi ingerlanneqartussaq siulittaasussamik siulersuisuunernillu qinersinermik naggaserneqassaaq.

- Soorunami siulittaasutut qinigassanngortissaanga, aamma allanik sassartoqarsimaneranik suli tusagaqanngilanga. Sassarusuttulli sassarnissaminnnut suli periarfissaqarput, Kuupik V. Kleist erseqqissaavoq.