IA kiserliorpoq

Inuit Ataqatigiit folketingimut qinigassanngortitaasa Namminersornermik inatsisip iluarsartuuteqqinneqarnissaanik kissaataat partiit allat akerleraat.

- Isumaqatigiissut isumaqatigiissutaavoq allanngortittariaqanngitsoq, Demokraatit folkertingimut qinigassanngortitaat, Michael Rosing ippassaq KNRimut oqarpoq, tamannalu maanna partiit allat aamma ilalerpaat.

Inuit Ataqatigiit folketingimut qinigassanngortitaasa siunnersuutigigaluarpaat naalagaaffiup ataatsimoortumik tapiissutai iluarsaanneqartassasut Kalaallit Nunaanni aningaasat naleerukkiartornerat malillugu maannakkutut Danmarkimi aningaasat naleerukkiartornerat malikkunnaarlugu, tamannali tassa partiit allat ilalernartinngilaat.

Siumup qinigassanngortitaa, Akitsinnguaq Olsen tamanna pillugu ima oqarpoq:

- Inuit Ataqatigiit iluminni avissaartuussimagunik tamanna namminneq akisussaaffigissavaat. Namminersornermut inatsit isumaqatigiinniutigineqarmat IA aamma partiit nunatsinniittut tamarmik tamanna isumaqatigiilluarlutik isummerfigaat, Akitsinnguaq Olsen oqarpoq.

Inuit Ataqatigiit isumaqarput ukiut kingulliit marluk ataatsimoortumik tapiissutit 100 millioner koruuninik nalikilleriarsimasut Kalaallit Nunaanni aningaasat pisissutaasinnaanerisa naleerukkiartornerat Danmarkimi aningaasat naleerukkiartorneranni sukkanerummat. Taamaakkaluartoq Atassutip suli qajassuutinnginnerullugit oqaaseqarfigai. Folketingimut qineqqusaartup Steen Lyngep tamanna kanngunarnerarpaa.

- IA-kkormiut akisussaassuseqanngippallaaqaat. Akisussaassuseqarniarunik maani Nunatsinni pisuussutigut maanna qallortariaqalerpagut, taamaalilluta aningaasarsiutiginiassagatsigit, Steen Lyngip eqqaasai pisuussutit, tassaapput aatsitassat Inuit Ataqatigiit uranitalinnik piiaaqqusinnginnerminni aningaasarsiutigerusunngisaat.

- Uuliasiorniarneq iluatsinngitsutut isikkoqarpoq, taamaattumik aatsitassat nunarsuarmioqatitsinnit piumaneqaqisut maanna iluaqutigilertariaqarpavut, taamaaliorutta aningaasarpassuit nunatsinnut isaalissapput, Steen Lynge oqarpoq.

Namminersornermik inatsisip iluarsartuuteqqinnerani 50 million koruunit 60 million koruunillu akornanni Nunatta pissarsiarisalersinnaagaat Inuit Ataqatigiit naatsorsorsimavaat.

Namminersornermut inatsit inerisarneqassasoq, Siumumit Akitsinnguaq Olsen isumaqarpoq:

- Namminersornermut inatsit maanna tunngavigilersimasarput ineriartornissamillu tunngaviliisoq atorlugu ingerlariaqqittariaqarpugut. Oqaloqatigiissutigisigu qanoq pitsanngorsarneqarsinnaanersoq, taamaalilluta ineriartortillugu, Akitsinnguaq Olsen taama oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat