IA: Kim Kielsen nassuiaateqartariaqarpoq
Pituffimmi kiffartuussisussarsiornerni suliffeqarfiit nunat allamiunit pigineqartut kiffartuussinissamut neqerooruteqarsinnannginneri pillugit malittarisassanik allanngortitsineq, Namminersorlutik Oqartussat danskillu naalakkersuisuisa peqataaffigisimagaat, KNR-ip allagaatinik takunnittussaatitaanermik qinnuteqaataasa akineqarnerani erserpoq.
Malittarisassat allanngortinneqarnerisa kinguneranik amerikamiut suliffeqarfiat, Exelis Services A/S Pituffimmi kiffartuussisussatut toqqarneqarpoq, tassalu ukiuni kingullerni 40-ni kiffartuussisuusimasoq Namminersorlutillu Oqartussanit piginneqataaffigineqartup, Greenland Contractorsip kiffartuussiunnaarnissaanik tamanna kinguneqarluni.
AAMMA ATUARUK Lidegaardip USA peqquaa Pituffiup kiffartuunneqarnissaanik isumaqatigiissut unitseqqullugu
Naalakkersuisut siulittaasua, Kim Kielsen tamanna pillugu KNR-imiit oqaaseqartinniarlugu saaffigigatsinni taassuma erseqqissarpaa oqaaseqarniarnani, oqarluni tamanna suliaq Nunanut allanut tunngasunut naalakkersuisup, Vittus Qujaukitsup kisimi oqaaseqarfigisassamagu.
Inuit Ataqatigiit siulittaaasuata, Sara Olsvigip eqqumiigaa, Pituffimmut suliamut taama pingaaruteqartigisumut, danskit ministeriunerat aamma Naalakkersuisut siulittaasuat ulloq manna tikillugu qisuarianngimmata.
- Suliaq Pituffimmut tunngasoq danskit ministeriunerata, Helle Thorning-Schmidtip peqataaffigerusunnagu aalajangiussinera eqqumiippoq. Suli eqqumiinneruvoq, Naalakkersuisut siulittaasuata, Kim Kielsenip tamanna suliaq pillugu oqaaseqarusunnginnera, Inuit Ataqatigiit siulittaasuat, Sara Olsvig KNR-imut ullumi taama oqarpoq.
AAMMA ATUARUK Johan Lund Olsen: Hammond Hardenbergilu ilisimatinneqarsimapput
Nunanut allanut tunngasunut naalakkersuisoq, Vittus Qujaukitsoq KNR-imut oqarpoq, tamanna pillugu aqagu tallimanngornermi aatsaat oqaaseqarsinnaalluni.