Politikki Inuussutissarsiutit

IA: Kiffaq-konto atuutsinneqalerli

Pisortanut akiitsut akilertinniarutsigit Kiffaq-konto atorneqartariaqalersoq, Inuit Ataqatigiit isumaqarput. Demokraatit tunngaviusumik isumaqataanngillat, Kiffaq-kontolli iluaqutissarisinnaasai takusinnaavaat. Innuttaasunut akiitsulinnut aamma iluaqutaasinnaasoq, Inuit Ataqatigiinneersoq Naaja Nathanielsen oqarpoq.

Allattoq Ivik Kristiansen, Peter Bye Andersen

maajip 20-at 2015 13:10

- Innuttaasut aningaasaqarnerminnut tamakkiisumik isiginnissinnaanissaannut iluaqutaassagaluarpoq. Aammalu inuiaqatigiit aningaasat pisassarisaat pissarsiarisinnaassavaat, kiisalu innuttaasut akornanni qassit pisortanit ikiorneqartariaqarnersut immaqa paasisinnaassagaluarparput, Naaja Nathanielsen oqarpoq.

Kiffaq-konto, tassaasoq akiliisussap akissarsinnginnermini akiligassai namminneerlutik akilerneqarnissaat pillugit aaqqissuussaq, siunnersuutissatut aatsaat qaqinneqanngilaq.

Aamma atuaruk Maliina Abelsen: Kiffaq konto pisariaqarpoq

Ineqarnermut naalakkersuisuusimasup, Siverth K. Heilmannip, Kiffaq-kontup atuutsinneqaqqilernissaa ukiaq siunnersuutigaa.

Kommune Kujallermi misiliutitut maannakkut ingerlavoq, pisortanullu akiitsut 932 millionit koruuniusut, ikilisinniarlugit nuna tamakkerlugu atuutsinneqartariaqalersoq, Naaja Nathanielsen isumaqarpoq.

Aamma atuaruk Pisortanut akiitsut amerliartupiloortut

Demokraatit inuup kiffaanngissusianut akuliunnertut isigigamikku tunngaviusumik akerliupput.

Aningaasaqarnermulli Naalakkersuisoq Andreas Uldum, kontup atuutilernissaanut akerliorujussuanngilaq.

Parteeqataata, Demokraatini aningaasaqarnermut tungasunut oqaaseqartartup, Tillie Martinussenip, Kiffaq-kontup iluaqutissarisinnaasai aamma takusinnaavai.

- Periarfissanik allanik aatsaat nassaarsinnaanngikkutta, inunnullu ikinnerussuteqartunut akiligassaminnik piaaralutik akiliineq-ajortunut, Kiffaq-kontup atorneqarsinnaanera isumassarsiaalluarsinnaavoq. Inuilli allat periarfissarsiuunniarsarisariaqarpagut, Tillie Martinussen oqarpoq.

Aamma atuaruk Misileraanikkut akiitsorpassuit ikilisarniarneqassapput

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.